Санавиацияҕа уонна эминэн хааччыйыыга бүддьүөтү улаатыннардылар

2026 сылга судаарыстыбаннай бүддьүөттэн санитарнай авиацияны уонна эминэн хааччыйыыны үбүлээһин улаатыаҕа, диэн Үп миниистирин эбээһинэһин толорооччу Иван Алексеев иһитиннэрдэ.

«Бүддьүөт, төһө да уустуктар баалларын үрдүнэн, социальнай хайысхатын сүтэрбэтэ. Ороскуот аҥаара – социальнай эйгэҕэ (үөрэхтээһин, култуура, доруобуйа харыстабыла, нэһилиэнньэни социальнай көмүскээһин) туһуланар. Кэлэр сылга эминэн хааччыйыыга быйылгытааҕар 1,4 төгүл кэриҥэ элбэх үп-харчы көрүлүннэ. Оттон санитарнай авиация көтүүлэригэр быйылгытааҕар икки төгүл кэриҥэ элбэх үбү көрдүбүт», – диэн Алексеев бэлиэтээтэ.

СӨ Үбүн министиэристибэтигэр чуолкайдаабыттарынан, 2026 сылга чэпчэтиилээх эминэн хааччыйыыга 3,8 млрд солкуобай көрүллүбүт, үбүлээһин 1,2 млрд солкуобайынан улааппыт. Оттон санитарнай авиацияҕа федеральнай үбү киллэрэн туран 2,6 млрд солкуобай көрүллүөҕэ, ити 2025 сыллааҕар 1,4 млрд солкуобайынан элбэх.