Сандаара Апросимова дуобакка аан дойду чөмпүйүөнэ буолла

Саха сирин спортсменката Сандаара Апросимова дуобакка аан дойду чөмпүйүөнэ буолла.

Оттон Тунара Федорова боруонса мэтээли ылары ситистэ. Бу туһунан Норуоттар икки ардыларынааҕы дуобакка Федерацията иһитиннэрэр. Ол курдук, Сардаана Апросимова уонна Тунара Федорова күрэхтэһии бастакы күнүгэр кыһыл уонна боруонса мэтээллэри дуобат чаҕылҕанныы оонньуутугар ыллылар.

Эр дьон уонна дьахталлар ортолоругар дуобакка аан дойду чөмпүйэнээтэ Москва уобалаһыгар ыытыллар. Күрэхтэһии үс диссипилиинэҕэ ыытыллар — чаҕылҕанныы (молниеноснай), түргэн уонна классическай. Чөмпүйэнээккэ Азияттан, Африкаттан, Европаттан уонна Америкаттан 27 дойду спортсменнара кыттыыны ылаллар.

Аан дойду чөмпүйэнээтин бириистээх пуондата биэс мөлүйүөн солкуобайтан итэҕэһэ суох (55 тыһыынча доллар). Күрэхтэһии балаҕан ыйын 15 күнүгэр диэри салҕанар.

Сандаара Апросимова 2021 сыллаахха Саха сириттэн Европа чөмпүйэнээтин 64-дуобат чөмпүйүөнэ буола сылдьыбыта. Оттон 2023 сыллаахха Кытайга норуоттар икки ардыларынааҕы турнирга алта аан дойдутааҕы гроссмейстеры кыайан, 100 харахтаах дуобакка кыһыл көмүс мэтээли ылбыта.

Сандаара Апросимова — норуоттар икки ардыларынааҕы Арктика оскуолатын выпускницата, Оҕо айымньытын дыбарыаһын иитиллээччитэ. Саха сирин дуобакка сүүмэрдэммит хамаандатын старшай тириэньэрэ Иван Павлов үөрэнээччитэ.