Хаартыска Сандал Алексеев тиксэриитэ
«Азия оҕолоро» норуоттар икки ардыларынааҕы оонньуулар биир кэрэхсэнэр күрэхтэһиилэринэн хапсаҕайдаһан тустуу буолар. Үгүс киһи аан дойду таһымнаах күрэхтэһиигэ саха төрүт тустуутун кыраҕы харахтарынан кэтээтилэр, тыыммакка даҕаны көрдүлэр.
«Азия оҕолоро» норуоттар икки ардыларынааҕы оонньууларга хапсаҕайдаһан тустууга биһиги хамаандабыт биэс кыһыл көмүс мэтээлтэн иккитин, 50 кг тустубут Үөһээ Бүлүү бөҕөһө Сандал Алексеев уонна 55 кг тустубут Кэбээйи улууһун бөҕөһө Олег Кононов ыллылар.
Хапсаҕайга бастакы кыһыл көмүс мэтээли Саха сирин хамаандатыгар Сандал Алексеев аҕалан үөрүү өрөгөйүн биллэ. Кини хапсаҕай уйаламмыт Үөһээ Бүлүү улууһун кыракый, аҕыйах нэһилиэнньэлээх, Оҥхой нэһилиэгиттэн сылдьар. «Азия оҕолоро» норуоттар икки ардыларынааҕы оонньууларга кытта кэлэригэр дойдутун дьоно киниэхэ эрэнэллэрин эппиттэрэ, алгыстарын анаабыттара. «Киниэхэ эрэлбит улахан. Бэйэтигэр анал тириэньэрэ суох, кылгас кэмҥэ Сергей Игнатьевка дьарыктаммыта. Ол эрээри улахан хапсаҕай түһүлгэтигэр чахчы айылҕатынан таҕыста. Биир кыһын улуус спортивнай оскуолатыгар дьарыктаммыта. Сбордарга сылдьан, хапсаҕайдаһар хаана уһуктан, тустан эрэр», — диэн Владимир Федоров санаатын үллэстэр.
Оттон «Азия оҕолоро» норуоттар икки ардыларынааҕы оонньуулар хапсаҕайга кыһыл көмүс призердара Сандал Алексеев маннык кэпсиир:
— Мин Үөһээ Бүлүү улууһун Оҥхой нэһилиэгиттэн сылдьабын, 9-с кылааһы бүтэрдим. Бастаан миигин Сергей Игнатьев дьарыктаабыта, онтон бу «Азия оҕолоро» оонньууларга сүүмэрдэнэрбитигэр Платон Саввинов эрчийбитэ. Сыл курдук Үөһээ Бүлүү спортивнай оскуолатыгар үөрэнэ сылдьыбытым, онтон дойдубар төннүбүтүм. Тустуунан уопсайа биэс сыл курдук, бастаан хапсаҕайынан, оттон көҥүл тустуунан дьарыктанабын. Мин ыйааһыммар, 50 кг уопсайа уон уол кытынна, онтон мин бастаатым. Бастаан монгол уолун, иккиһин Уһук Илин федеральнай уокурук аатыттан саха уола киирбитэ, ону кытары тустубутум. Хас биирдиилэрин кытары сыралаһан кыайдым, чэпчэкитик кэлбэтэ. Саамай ыарырҕаппытым аан бастаан Монголия бөҕөһүн кытары киирсиим буолар, олус кытаанах этэ.
Аан дойду таһымнаах күрэхтэһиигэ кыһыл көмүһү ылбыппыттан олус үөрдүм, астынным. Кыайыыбын бастатан туран, ийэбэр, бастакы тириэньэрбэр Сергей Игнатьевка, кэлин дьарыктаабыт Платон Саввиновка уонна аймахтарбар аныыбын. Салгыы тустуунан өссө күүскэ дьарыктанар уонна үөрэххэ туттарсар баҕалаахпын. Дойдум дьонугар үтүө тылларыгар, алгыстарыгар махтанабын.
Арассыыйа олохтоохторо 2026 сылга мунньуллар биэнсийэлэриттэн 440 тыһыынча солкуобайы биир кэмнээхтик ылыахтарын сөп диэн РИА…
Дьокуускайга өрөспүүбүлүкэ муниципальнай тэриллиилэрин бэрэстэбиитэллээх уорганнарын дьокутааттарын III сийиэһин пленарнай мунньаҕын улуустартан уонна нэһилиэктэртэн кэлбит…
Киин куоракка икки күн устата өрөспүүбүлүкэ муниципальнай тэриллиилэрин бэрэстэбиитэллээх уорганнарын дьокутааттарын III сийиэһэ үгүс дьокутааты…
Ил Дархан туһаайан этиитигэр дьоҕус урбааны өйүүр боппуруоска болҕомтотун ууруо диэн, норуот дьокутаата, Ил Түмэн…
“Илии сылааһа” сыах (сал. Саввина И.Е.) филиала Куокуйдааҕы “Надежда” холбоһук (сал. Еремеева Т.У.) бу сылга…
Дьокуускайдааҕы полиция 1-кы №-дээх отделын дьуһуурунай чааһыгар олохтоох дьахтар кини аатыгар сокуоннайа суохтук 145 тыһ.солк.…