Сангаар олохтооҕо ресто-баарга киһини охсон ыстарааптанна

Кэбээйи оройуонун суутун уурааҕынан Сангаар олохтооҕо  Административнай быраабы кэһии туһунан кодексатын  6.1.1 ыстатыйатыгар көрүллүбүт административнай быраабы кэһиини оҥорбутунан буруйдааҕынан билинилиннэ уонна 5000 солкуобай кээмэйдээх административнай ыстараап ананна.

Суутунан чопчуламмытынан, бу сыл балаҕан ыйын 27 күнүгэр эр киһи «Трио» ресто-баарга сылдьан, эмсэҕэлээччини төбөтүн сутуругунан охсубут. Мэдисиинэ эспэртииһэтэ эмсэҕэлээччи хаҥас илиитин тарбаҕар хаан турбутун уонна сирэйин бааһырдыбытын бигэргэппит. Суут буруйдаах буруйун билиммитин уонна кэмсиммитин учуоттаан, административнай ыстараабынан муҥурданна. Суут уурааҕа сокуоннай күүһүгэр киирдэ, -диэн СӨ Сууттарын холбоһуктаах пресс-сулууспата иһитиннэрэр.