Сангаар саҥа поликлиникаланыа

СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников кэккэ улуустарга доруобуйа харыстабылын эбийиэктэрин тутуу уонна саҥалыы уларытан оҥоруу хаамыытыгар аналлаах мунньаҕы ыытта.

Сүрүн болҕомто РФ Бэрэсидьиэнэ В.Путин көҕүлээбит «Уһун уонна көхтөөх олох» национальнай бырайыагын чэрчитинэн олоххо киллэриллэр эбийиэктэргэ, ону тэҥэ Нерюнгри маастар-былаанын тэрээһиннэригэр уурулунна.

Дьүүллэһии биир сүрүн тиэмэтинэн Кэбээйи улууһугар Сангаарга балыыһа комплекса буолла. Тутуу бастакы түһүмэҕэ , симиэнэҕэ 104 киһи сылдьар кыахтаах поликлиникатын үлэтэ түмүктэннэ. Эбийиэк 100 бырыһыан бэлэм. Үлэҕэ киллэрэргэ көҥүл ылыллыбыт. Мэдиссиинэ тэрилтэтин арыйыы тохсунньу бүтүүтүгэр былааннанар.

Мунньах чэрчитинэн Мэҥэ Хаҥалас улууһугар Майаҕа балыыһа комплексын тутуу хаамыыта көрүлүннэ. Манна үлэ көхтөөхтүк салҕанар. Иһитиннэриллибитинэн тутуу 38 бырыһыан кэриҥэ бэлэм. Былаһааккаҕа 13 киһи үлэлиир. Кинилэр ахсааннарын элбэтэр былааннаахтар. Бу бырайыак «Уһун уонна көхтөөх олох» национальнай бырайыагынан олоххо киллэриллэр.

Намҥа 50 куойкалаах куорпус 97 бырыһыан бэлэм буолбут. Тутууга 27 киһи үлэлиир. Ньурбаҕа эмиэ маннык куорпуһу тута сылдьаллар.

РФ Бэрэсидьиэнин сорудаҕынан оҥоһуллубут маастар-былаан чэрчитинэн, доруобуйа харыстабылын эбийиэктэрин олоххо киллэрии хаамыыта туспа көрүлүннэ. Нерюнгрига оройуоннааҕы киин балыыһа КВД дьиэтин саҥардан оҥоруу түмүктэнэрэ чугаһаабыт. Тутуу 95 бырыһыан кэриҥэ бэлэм буолбут. Ситэрэн-хоторон биэрэллэрэ хаалбыт. Бу балыыһаҕа улахан дьону көрөр поликлиникаҕа хапытаалынай өрөмүөн ыытыллар, 92% бэлэм.

Мунньаҕы түмүктүүрүгэр Дмитрий Садовников үлэни толоруу болдьоҕун уонна хаачыстыбатын кытаанахтык хонтуруоллааһын суолтатын бэлиэтээтэ. Тустаах министиэристибэлэргэ, сакаасчыттарга уонна бэдэрээттэһэр тэрилтэлэргэ олохтоммут кыраапыктары тутуһалларыгар, үлэни хонтуруолга туталларыгар сорудахтанна.

Сиһилии: https://www.sakha.gov.ru/news/18394

СӨ Ил Дарханын уонна Бырабыыталыстыбатын пресс-сулууспата