Хаартыска: Андрей Сорокин (СИА)
Ил Дархан Айсен Николаев Кэбээйи улууһун киинигэр Сангаар бөһүөлэгэр саҥа аэропорду үөрүүлээх быһыыга-майгыга арыйда.
Улуус саҥа аэропорда магистральнай инфраструктураны модернизациялааһын уонна кэҥэтии Биир кэлим былаанын чэрчитинэн тутулунна. Саҥа аэровокзал чааска 35 пассажирга суоттанан тутулунна, хонтуруоллуур-аһарар пууннаах, патруль суоллаах уонна да атын инфраструктуралардаах.
«Дойду бэрэсидьиэнэ Владимир Путин, Уһук Илиҥҥэ РФ бэрэсидьиэнин боломуочуйалаах бэрэстэбиитэлэ Юрий Трутнев өйөбүллэринэн, биһиги көрдөһүүбүтүнэн “Хотугу сир аэропортара” федеральнай казеннай тэрилтэ аэропортарын модернизациялааһыҥҥа туспа бырагыраама ылыллыбыта. Билигин өрөспүүбүлүкэҕэ барытыгар аэропортар тутуллаллар, саҥардыллаллар. Бу бырагыраама чэрчитинэн Кэбээйи улууһун олохтоохторо стандартка барытыгар эппиэттиир саҥа комплекстаммыттарыттан олус үөрэбин. Барыгытын бу кэрэ-бэлиэ күнүнэн эҕэрдэлиибин. Биһиги аэровокзалбыт уонна бары инфраструктурата уонунан сыллар тухары Кэбээйи улууһун дьонун туһугар үлэлии турарыгар баҕарабын” – диэн Айсен Николаев бэлиэтээн эттэ.
Үс мэндиэмэннээх саҥа аэровокзал көтөр аалынан туһанар дьоҥҥо эрэ буолбакка, аэропорт үлэһиттэригэр уонна көтөр састаапка олус табыгастаах. Кэбиниэттэр автоматизированнай оробуочай миэстэлээхтэр уонна сибээс ситимнээхтэр. Үһүс мэндиэмэҥҥэ диспетчердэр пууннара баар.
Тутуу сакаасчыта – «Ространсмодернизация» федеральнай казеннай тэрилтэ, генеральнай бэдэрээччит — «Вариант Плюс» ХЭО. Эбийиэги тутууга уопсайа 320 мөлүйүөн 841 тыһыынча солкуобай бэриллибитэ.
Кэбээйи улууһун баһылыга Иван Левин бэлиэтээбитинэн, “Сангаар” аэропорт олус баай устуоруйалаах.
“Аэровокзал саҥа дьиэтэ тутуллан, тырааныспарка уустук схемалаах улуус олохтоохторугар авиация сайдарыгар эрэл үөскээтэ. Биһиэхэ авиация инфраструктуратын сайыннарыы – сүдү кыах уонна улахан эрэл”, — диэтэ Иван Левин.
Манна даҕатан эттэххэ, Биир кэлим былаан чэрчитинэн 2024 сыл бүтүөр диэри 14 аэропорду (Дьокуускай, Мииринэй, Нерюнгри, Өлүөхүмэ, Черскэй, Эдьигээн, Хаандыга, Белай Гора, Үөһээ Бүлүү, Бүлүү, Депутатскай, Сангаар, Полярнай уонна Уус Ньара) саҥардыы үлэтин түмүктээһин былааннанар. Үөһээ Бүлүү, Эдьигээн, Сангар, Белай Гора уонна Депутатскай аэропортара хайыы үйэ саҥардыллан бүттүлэр.
СӨ Ил Дарханын уонна бырабыыталыстыбатын пресс-сулууспатын матырыйаалынан
Ил Дархан 2025 сыл түмүктэрин таһаарыаҕа уонна өрөспүүбүлүкэ сайдыытын кэскилин торумнуоҕа. Ахсынньы 23 күнүгэр, Дьокуускай…
Кини сыл барыллаан түмүктэрин таһааран, инники былааннарын кытта билиһиннэриэҕэ. СӨ Бырабыыталыстыбатын иһинэн ЗАГС управлениетын салайааччыта…
Дьокуускайдааҕы куорат суута уорууга (РФ Холуобунай кодексатын 158-с ыстатыйатын 2-с чааһын «в» пууна) буруйданар киһи…
Кэлиҥҥи сылларга Дьокуускайга улуустар күннэрин ыытыы үгэскэ кубулуйан, улахан суолталаах тэрээһин биир дойдулаахтары түмэр буолан,…
“Олоххо туох кэрэ, дьикти баарын барытын үлэ айбыта, айа турар. Ол аата дьол – айар-тутар…
Бүгүҥҥүттэн, ахсынньы16 күнүттэн, Дьокуускай куоракка 51п нүөмэрдээх саҥа маршрут сырыытын саҕалыаҕа. Саҥа маршрут дьон үгүстүк…