Сангаарга саҥа поликлиника тутуута түмүктэннэ

Кэбээҥи улууһугар Сангаарга саҥа поликлиника тутуута түмүктэннэ. Манна симиэнэҕэ 104 киһи көрдөрүнэр кыахтаах.

Тутуу «Доруобуйа харыстабыла» национальнай бырайыак иитинэн ыытыллыбыт. Бүгүн бу бырайыак «Уһун уонна көхтөөх олох» бырайыагынан салҕанар.

Кэбээйи улууһун олохтоохторун тутуу түмүктэммитинэн СӨ Ил Дархана Айсен Николаев эҕэрдэлээтэ.

—Сангаарга бу эбийиэги тутар туһунан быһаарыы балачча уустук этэ. «Доруобуйа харыстабыла» национальнай бырайыак баар буолан, РФ Бэрэсидьиэнэ В.Путин быһаарыытынан, «Биир Ньыгыл Арассыыйа» баартыйа норуодунай бырагырааматынан биһиги өрөспүүбүлүкэбит ыраах хоту бөһүөлэгэр маннык бэртээхэй эбийиэк тутулунна, — диэн бэлиэтээтэ Ил Дархан Айсен Николаев.

Ил Дархан Саха сиригэр национальнай бырайыак олоххо киирбит сылларыттан доруобуйа харыстабылын 110-тан тахса эбийиэгэ олоххо киллэриллибитин санатта.

—Биһиги Сахабыт сиригэр кэнники кэмҥэ доруобуйа харыстабылын бөдөҥ эбийиэктэрэ тиһиктээхтик арыллаллар. Маныаха бу барыта саҥа, аныгы, кырасыабай тутуулар буолаллар. Сангаарга саҥа эбийиэк аһыллыбытын таһынан, чугастааҕы кэмҥэ аны Нам, Бүлүү улуустарыгар эмиэ саҥа тутуулар арыллыахтара. Майаҕа, Ньурбаҕа балыыһа комплекстара тутуллаллар. Биэлсэр-акушер пууннара, амбулаториялар арктическай улуустарга ыраах нэһилиэнньэлээх пууннарга, тыа сирдэригэр дьэндэйиэхтэрэ, — диэтэ кини.

Кэбээйи улууһун баһылыга Иван Левин балыыһа комплексын бастакы түһүмэҕин түмүктээһини оройуоннааҕы доруобуйа харыстабылын сайдыытыгар улахан суолталаах хардыы буоларын эттэ. Кини Ил Дархаҥҥа, СӨ Бырабыыталыстыбатыгар уонна национальнай бырайыагы олоххо киллэриини өйөөбүт бары дьоҥҥо, тутааччыларга махтанна.

Улуус киин балыыһатын кылаабынай бырааһын э.т. Диана Варфоломеева балыыһа аныгы тэрилинэн хааччыллыбытын, бу улууска доруобуйа харыстабылын историятыгар киирэрин бэлиэтээтэ. Өрөспүүбүлүкэ, дойду салалталарыгар гражданнар доруобуйаларын харыстааһын боппуруостарыгар болҕомтолорун уурбуттарыгар махтанна.

Элбэх оҕолоох ийэ Айталина Алексеева: «Биһиги бу күнү наһаа кэтэспиппит. Эргэ поликлиникабытын кытары тэҥнээтэххэ, манна олус үчүгэй. Улуус олохтоохторо дойду, өрөспүүбүлүкэ салалталарыгар аныгы тэриллээх олус табыгастаах, дьоҥҥо-сэргэҕэ наадалаах, туһалаах эбийиэк иһин махтанабыт», — диэн санаатын үллэһиннэ.

Саҥа поликлиника аныгы тэрилинэн хааччыллыбыт. Манна Croma диэн тииһи эмтииргэ, оҥорорго саҥа тэрил, УЗИ, «МАКСИМА» флюорографическай аппараат, уо.д.а. аныгы үйэ ирдэбилигэр эппиэттиир тэриллэринэн хааччыллыбыт. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.

Сиһилии: https://www.sakha.gov.ru/news/19399

Андрей Сорокин хаартыскаҕа түһэриитэ, ЯСИА