Санита Ай уонна Эрхан «Талааннаах ыал» кыайыылаахтарынан буоллулар

Ахсынньы 3 күнүгэр Москваҕа оҕо музыкальнай тыйаатырыгар «Аҕа дойду көмүскэлин ыала» бириэмийэ чэрчитинэн дьоруойдар байыастарын дьиэ кэргэттэрин үөрүүлээх сиэрэ-туома ыытылынна.

«Талааннаах ыал» номинация кыайыылааҕынан Санита Ай уонна Эрхан Николаевтар дьиэ кэргэттэрэ буоллулар.

«Биһиги улахан дойдубутуттан баара-суоҕа 10 ыал талылынна, кинилэр ортолоругар биһиги — Николаевтар дьиэ кэргэттэрэ. Олус үөрдүбүт, баччааҥҥа диэри итэҕэйбэккэ сылдьабыт… Эстрада тыйаатырыгар, мэлдьи биһигини өйүүр дириэктэргэ Татьяна Чаранскаяҕа улахан махталбытын биллэрэбит. Бу кыайыыны Аҕа дойду көмүскээччилэрин дьиэ кэргэттэригэр аныыбыт. Биһиги уолаттарбыт, бырааттарбыт, ыал аҕалара доруобай, этэҥҥэ эргиллэн төннөллөрүгэр баҕарабыт», — диэтэ Санита Ай.

Куонкуруска дойду үрдүнэн байыаннай дьайыы бэтэрээннэрин дьиэ кэргэттэрэ бары кэриэтэ кытыннылар. Бириэмийэни 10 номинациянан туттардылар. Кинилэр ортолоругар «Военная династия», «Спасая жизни», «Наследники Великой Победы», ону кытта «Семейная история о любви» номинациялар.

Санатан эттэххэ, бириэмийэни «Аҕа дойдуну көмүскээччилэр» судаарыстыбаннай пуонда тэрийбитэ. «Наша семья – наша Победа» бырайыак чэрчитинэн тэлэбиидэнньэнэн уонна эрэгийиэннээҕи СМИ-нэн алта ый устата көлүөнэттэн көлүөнэҕэ таптал холобурунан буолар, олоххо көхтөөх уратылаах дьон-сэргэ туһунан кэпсээбиттэрэ.