Санитарнай авиация биэс сыллаах үлэтэ

Өрөспүүбүлүкэтээҕи катастрофа мэдиссиинэтин киинин санитарнай авиацията биэс сыллааҕы үлэтэ хайдаҕый?

Кэнники биэс сылга өрөспүүбүлүкэтээҕи катастрофа мэдиссиинэтин киинин санитарнай авиациятын (РЦМК) 2018-2022 сылларга үлэтин көрдүлэр. Ити сылларга суһал санитарнай-авиационнай көмө 14 770 ыарыһахха, эмсэҕэлээбиккэ, ол иһигэр 2 203 оҕоҕо оҥоһуллубут. Оройуон балыыһаларын сайаапкаларынан 9 510 санитарнай сорудах толоруллубут. 7 736 көтүү оҥоһуллубут (95%  МИ-8 бөртөлүөт көппүт). Сиринэн 266 көмө оҥоһуллубут.

Үксүн хааннарын эргиирэ мөлтөх дьоҥҥо — 4 690  ыарахан ыарыһахха суһал көмө ыҥырыллыбыт. Иккиһинэн — 2 285 киһи эчэйиинэн, уокка сиэтиинэн, тоҥуунан буолара ыйыллар. Үһүс элбэх көрдөрүү — 1762 киһи:  бу оҕо күүтэр дьахталлар, оҕолоноору, оҕолонон бараннар. Салгыы 1077 — куртах, оһоҕос ыарыылаахтарга көмө оҥоһуллубута бэлиэтэнэр.

Пандемия кэмигэр, 2020 – 2022 сс. санитарнай авиация (РЦМК)  коронавируһунан ыараханнык ыалдьыбыт  2 412 киһини балыыһаҕа илдьибит.

Билигин суһал  мэдиссиинэ көмөтүн уонна СӨ нэһилиэнньэни эвакуациялыыр мэдиссиинэ көмөтүн Дьокуускай куорат санитарнай авиациятын киин ыстаансыйата уонна оройуон киин балыыһаларын баазаларыгар баар санитарнай авиация 7 филиала: Орто Халыма, Баатаҕай, Ньурба, Мииринэй, Тиксии, Нерюнгри, Ленскэй оҥороллор. Бэлиэтэнэринэн мэдиссиинэ көмөтүн оҥорор тэриллэрдээх 5 сөмөлүөт, 15 бөртөлүөт, ол иһигэр Ми-8 МТВ 5 бөртөлүөтэ бааллар.

СӨ Ил Дархан, Бырбыыталыстыба, Доруобуйа харыстабылын министиэристибэтин, РЦМК экэнэмиистэрин көхтөөх үлэлэринэн, «Доруобуйа харыстабыла» Национальнай бырайыак «Мэдиссиинэ бастакы көмөтүн оҥоруу тиһигин сайыннарыы» федеральнай бырагырааматынан үбүлээһин кээмэйэ  улааппыт.  Ол түмүгэр, санитарнай авиация көмөтүнэн пациеннары тиэйии элбээбит. Маныаха ирдэнэр былааннар толоруллаллара ыйыллар.

СӨ Доруобуйа харыстабылын министиэристибэтин саайтыттан