Санитарнай авиациянан көтүү ахсаана эбилиннэ

РФ Бэрэсидьиэнэ Владимир Путин 2023 сылтан Уһук Илиҥҥэ санитарнай авиация сайдыытыгар үбүлээһини икки төгүл улаатыннарарга сорудахтаабыта. Судаарыстыба өйөбүлүнэн, быйыл ыарыһахтары аҕалыы, тириэрдии ахсаана 31% элбээтэ.

СӨ Доруобуйа харыстабылыгар министиэристибэтин чахчытынан, 2023 сыл саҕаланыаҕыттан 2600-тэн тахса киһиэхэ суһал мэдиссиинэ көмөтө оҥоһулунна. Онтон Саха сирин санитарнай авиацията көмөҕө көтөр сүрүн төрүөттэринэн сүрэх ыарыылара, эйэчиилэр уонна араас бааһырыылар буолаллар. Соторутааҕыта Саахал мэдиссиинэтин исписэлиистэрэ Бүлүү улууһуттан 2 эмсэҕэлээбит киһини (биирэ ыарахан туруктааҕы) аҕаллылар.

Саахал мэдиссиинэтин өрөспүүбүлүкэтээҕи киинин биэлсэрэ Владислав Григорьев эппитинэн, Л 410 сөмөлүөтүнэн 1,5 чаас устата этэҥҥэ көтөн кэллилэр уонна эмсэҕэлээбит дьону Өрөспүүбүлүкэтээҕи 2 №-дээх балыыһаҕа киллэрдилэр.