Санкт-Петербурга «Морские ворота Якутии» быыстапка аһылынна

Бүгүн, кулун тутар 19 күнүгэр, Санкт-Петербурга Арассыыйатааҕы Арктика уонна Антарктика судаарыстыбаннай түмэлигэр Арассыыйа худуоһунньуктарын сойууһун чилиэнэ Владимир Гвоздюк «Морские ворота Якутии» быыстапката аһылынна.

Быыстапканы Саха сирин Бастайааннай бэрэстэбиитэлистибэтэ, Арктика, Антарктика түмэлэ уонна Тиксии бөһүөлэгин дьаһалтата тэрийдилэр. Быыстапка ыам ыйын 25 күнүгэр диэри туруоҕа.

«Морские ворота Якутии» быыстапка Саха сиригэр Арктика күнүн көрсө аһылынна. Бу бэлиэ күн 2014 сыллаахха олохтоммута. Бу кэмтэн сыл аайы өрөспүүбүлүкэҕэ кулун тутар 19 күнүгэр Арктика күнэ бэлиэтэнэр.

Арассыыйа Худуоһунньуктарын сойууһун чилиэнэ Владимир Еремеевич Гвоздюк өр кэмҥэ Тиксиигэ олорбута, үлэлээбитэ. Бу кэмҥэ кини муораны, хотугу айылҕаны, хоһуун дьонун холустаҕа дьүһүйбүтэ. Кини Хотугулуу-Илиҥҥи муора флотун управлениетыгар худуоһунньуктаабыта, онтон Тиксиитээҕи норуодунай художественнай түмэлгэ уопсастыбаннай дириэктэринэн, оҕо художественнай оскуолатыгар уһуйааччынан үлэлээбитэ.

1986 сыллаахха Арктикаҕа анаммыт уопсастыбаннай уонна айар үлэтин иһин, «Бочуоттаах полярник» аат иҥэриллибитэ.