Санкт-Петербурга Саха сирин киинэтин нэдиэлэтэ ыытыллар

Муус устар 22-26 күннэригэр Санкт-Петербург куоракка баар «Ленфильм» киинэ устуудьуйатыгар Саха сирин киинэтин нэдиэлэтэ ыытыллар. Куорат олохтоохторо уонна ыалдьыттара Саха сирин режиссердарын уус-уран киинэлэрин көрүөхтэрин сөп. 

Бу күннэргэ «Хаар куйаар номохторо», «Кыталыктаах кырдалым», «Триумф», «Диодорова. Сүүрүгү утары» киинэлэри көрдөрүөхтэрэ. Киинэлэр бары нууччалыы субтитрдаахтар.

Тэрийээччилэр этэллэринэн, Арассыыйа биир кырдьаҕас киинэ устуудьуйатын кытта үлэлэһии салҕанар былааннаах. Ол курдук, Кыайыы 80 сылын көрсө Саха сиригэр Аҕа дойду Улуу сэриитин туһунан уонна Ленинград блокадатын туһунан «Ленфильм» кыһыл көмүс пуондатын киинэлэрин көрдөрүөхтэрэ.

Саха сирин киинэтин нэдиэлэтэ бастайааннай бэрэстэбиитэлистибэ уонна «Сахафильм» киинэ хампаанньатын өйөбүллэринэн ыытыллар диэн СӨ Ил Дарханын уонна Бырабыыталыстыбатын дьаһалтатын пресс-сулууспата иһитиннэрэр.