Санкт-Петербурга III Бүтүн Арассыыйатааҕы Ыччат Арктическай пуорума буолла

Кулун тутар 20 күнүгэр Санкт-Петербурга Арктика сайдыытын тирээн турар боппуруостарыгар, туруктаах буолууну хааччыйыыга уонна эрэгийиэн экологическай туруктаах буолуутун үрдэтиигэ, ону тэҥэ ыччаты Арктиканан интэриэһиргэтэр сыаллаах III Бүтүн Арассыыйатааҕы Ыччат Арктическай пуорума ыытылынна.

Пуорум РФ Арктическай зонатын харыстыырга уонна сайыннарыыга интэриэстээх, научнай үлэнэн дьарыктанар 350-тан тахса устудьуону уонна эдэр исписэлиистэри түмтэ.

Санкт-Петербургтан уонна Арассыыйа хотугу эрэгийиэннэриттэн кэлбит устудьуоннар уонна эдэр исписэлиистэр Арктиканы сайыннарыы уонна харыстааһын сүрүн боппуруостарын дьүүллэстилэр. Кыттааччылары РФ Бырабыыталыстыбатын Бэрэссэдээтэлин солбуйааччыта — РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев, РФ Уһук Илини уонна Арктиканы сайыннарыыга миниистирэ Алексей Чекунков, Санкт-Петербург губернатора Александр Беглов эҕэрдэлээтилэр.

Пленарнай мунньах уонна үс тематическай сиэксийэ ыытылынна: «Норуоттар икки ардыларынааҕы бииргэ үлэлээһин. Арктика култуурунай-социальнай-экэнэмиичэскэй сайдыыта”, “Инновационнай технологиялар. Арктикаҕа экологическай уонна климатическай усулуобуйалар уларыйыылара”, “Арктика. Саҥа көлүөнэ: муниципальнай көҕүлээһиннэр».

Быһа эпииргэ РФ Арктика зонатын бэрэстэбиитэллэрэ холбоммуттара.

Тыл этээччилэр тиэмэлэригэр СМП куттала суох буолуута уонна сайдыыта, Арктическай шельфка баар сир баайын хостооһун, эрэгийиэн куттала суох буолуутун хааччыйыыга Арассыыйа Ыксаллаах быһыыга-майгыга министиэристибэтин оруола, Арктика куораттарын архитектурата, тулалыыр айылҕа уларыйыыта уонна да атын тирээн турар боппуруостар киирбиттэрэ.

Пуорум сүрүн исписэлиистэри, РФ Арктическай эрэгийиэннэрин бэрэстэбиитэллэрин, үрдүк үөрэх кыһаларын, о.д.а. дакылааттарын түмтэ.

Форум түмүгүнэн кыттааччылар Арассыыйа Федерациятыгар Арктика зоната ураты стратегическай суолталааҕын, дойду энергетическэй кыаҕын бөҕөргөтүүгэ, логистикатын кыаҕын кэҥэтиигэ, эрэгийиэҥҥэ эдэр каадырдары тардыыга уонна дойду куттала суох буолуутун хааччыйыыга оруолун өйдөтөр резолюцияны ылыннылар.