Саҥыйахтаахтар суол-иис боппуруоһун туруорсаллар

Өлүөхүмэ улууһугар ситэриилээх былаас ааспыт сыллааҕы үлэтин отчуота буола турар. Үөрэх уонна билим миниистирэ Нюргуна Соколова салайааччылаах бөлөх иккиһинэн Саҥыйахтаах сэлиэнньэтигэр отчуоттаата.

Урут отчуоттааччылар аҥардас тылынан кэпсиир эбит буоллахтарына, аны слайдалаах, олох араас эйгэтигэр өрөспүүбүлүкэ сыыппараларын көрдөрөн, ону ааһан улуус холобурдарын, көрдөрүүтүн киллэрэн, тэҥнии тутан сырдаталлар. Онон бэрт сэргэхтик ааһар. Ол курдук, үөрэх уонна билим миниистирэ Нюргуна Соколова Бырабыыталыстыба ааспыт сыллааҕы үлэтин-хамнаһын сырдатта, “Сахатранснефтегаз” тэрилтэ генеральнай дириэктэрэ, Ил Түмэн дьокутаата Алексей Колодезников туох үлэ барбытын билиһиннэрдэ.

Отчуокка нэһилиэнньэ кыттыыта көхтөөх, туруорсар боппуруостара даҕаны суолталаах, кэскиллээх. Улуус кииниттэн тэйиччи турар буолан “Умнас” суолу оҥоруу, киин ситимҥэ холбонуу, оскуола тутуутун, уу тырааныспарын, уу суолун тырааныспардара тиксэр тохтобулу (дебаркадер), үлэлээбэт биэнсийэлээхтэргэ айан төлөбүрүн толуйуу, о.д.а. боппуруостары туруорсаллар, ыйыталлар. “Ыарыһах Өлүөхүмэ куоракка тиийэр, онтон салгыы Дьокуускайга барар. Онон барыларын да буолбатар бэтэрээннэри Дьокуускайга ханнык эмэ поликлиникаҕа сыһыараллара буоллар, кэлэ-бара көрдөрүнэ сылдьыахтарын сөп этэ”, – диэн олохтоохтор этэллэр. Тустаах боппуруоһу салайааччылар үөрэтэн көрүөх буоллулар, Арктика улуустарыгар оннук холобур баарын ыйдылар. Үп-харчы оҥоһуллубутун, “Умнас” суол салгыы оҥоһуллуоҕун эттилэр. Бытыктаах оскуола дьиэтин тутуутунан миниистир ааспыт сыллааҕы курдук Ил Түмэн дьокутааттарын кытта тэҥҥэ үлэлэһиэхпит диэн эттэ. Хас биирдии киирбит ыйытыыга отчуоттуур бөлөх сиһилии хоруйдаата, сороҕор быһааран, өйдөтөн да биэрдэ.

Отчуоттуур бөлөх бүгүн үлэтин түөрт хайысханан салгыыр.