Сардаана Гурьева хомуурга барбыт киһи чугас дьонун өйүүр туһунан этиилэрин тириэртэ

Саха сиригэр киһи быраабыгар боломуочунай Сардаана Гурьева быстах хомуурга барбыттары уонна кинилэр дьиэ кэргэннэрин социальнай көмүскээһиҥҥэ эбии дьаһаллары ылар туһунан РФ киһи быраабыгар боломуочунайа  Татьяна Москальковаҕа этии киллэрдэ.

Бу туһунан бүгүн Сардаана Гурьева брифиҥҥэ иһитиннэрдэ.

«Быстах хомуурга барбыттар дьиэ кэргэннэрин өйүүргэ эбии дьаһаллар тустарынан Ил Дархан ыйааҕа тахсыбыт күнүттэн ыла киһи быраабыгар боломуочунайга социальнай өйөбүл дьаһалларын кытта сибээстээх этиилэр, ыҥырыы суруктар киирэн барбыттара. Биһиги ону барытын анаалыстаан баран, уталыппакка РФ-га киһи быраабыгар боломуочунай Татьяна Москальковаҕа бэйэбит этиилэрбитин киллэрбиппит. Кини Арассыыйа Оборонаҕа министиэристибэтигэр  тириэрдибитэ”, — диэн быраабы араҥаччылааччы иһитиннэрдэ.

Сардаана Гурьева быһаарбытынан, кэпсэтии чуолаан  быстах хомуурга ылыллыбыттар чугас аймахтарыгар кирэдьиит каникулун биллэрии уонна байыаннай сулууспалаахтары кытары сокуонунан бигэргэтиллибэккэ эрэ олорбут дьахталларга социальнай өйөбүл миэрэлэрин туһунан барар.

Быстах хомуур хампаанньата саҕаланыаҕыттан ыла өрөспүүбүлүкэ киһи быраабын араҥаччылыыр институтугар  550-тан тахса ыҥырыы, этии  киирдэ.

Быраабы араҥаччылааччы  эппитинэн, этиилэр, ыҥырыылар 90 бырыһыаннара   “Арассыыйа  Федерациятыгар быстах хомуурга бэлэмнэнии уонна хомуур туһунан” федеральнай сокуону олоххо киллэрии боппуруостарыгар,  сыһыаннаахтар.

Ил Дархан уонна Бырабыыталыстыба пресс-сулууспатын матырыйаалларынан