Сардаана Корякина – Николай Неустроев аатынан бириэмийэ саҥа лауреата

Быйыл ахсынньы 15 күнүгэр саха литературатын төрүттээччилэртэн эдэрдэрэ, сахалыы комедия жанрын олохтообут драматург, саха уонна нуучча тылларынан дэгиттэрдик айбыт прозаик, публицист, уопсастыба деятелэ, саха үөрэнэр ыччатын лидерэ Николай Денисович Неустроев төрөөбүтэ 130 сылын туолла. Бу күн Н.Д. Неустроев аатынан өрөспүүбүлүкэтээҕи эдэр суруйааччылар бириэмийэлэрин хамыыһыйата лауреат ким  буоларын быһаарда.

Быйыл хамыыһыйа хаһааҥҥытааҕар да элбэх эдэр суруйааччы – түөрт номинант айар үлэтин сыаналаата. Аһаҕас куоластааһын түмүгүнэн прозаик Сардаана Александровна Корякина-Сардаана быйылгы Н.Д. Неустроев аатынан өрөспүүбүлүкэтээҕи эдэр суруйааччылар бириэмийэлэрин лауреатын үрдүк аатын сүктэ. Кини быйыл «Кимиэхэ да этимэ…» сэһэнэ туспа кинигэнэн тахсан (Айар), «Ааттамматах кэпсээн», «Аптаах харыйа» кэпсээннэрэ, «Элиэ сэһэнэ» эссетэ «Чолбон» сурунаалга бэчээттэнэн, «Капитан Грэй» бүтүн Россиятааҕы аччыгый проза форум-фестивалын уонна «Чолбон айар кыһата» бырайыак кылгас тиһиктэригэр киирэн айар үлэ ыырыгар бигэтик үктэммитин, үгүстүк үлэлиирин көрдөрдө.  Сардаана Чурапчыттан төрүттээх, Дьокуускай куоракка олорор, СӨ Пенсияҕа фондугар үлэлиир, икки кинигэ ааптара.

Н.Д. Неустроев аатынан бириэмийэни ахсынньы 18 күнүгэр классик суруйааччы төрөөбүтэ 130 сылыгар анаммыт, кини аатын сүгэр Smart-библиотекаҕа буолбут «Николай Неустроев – саха санаатын сирдьитэ» дьоро киэһэ кэмигэр СӨ культураҕа уонна духуобунай сайдыыга миниистирин солбуйааччы Марина Силина уонна «Саха сирин суруйааччыта» ассоциация бэрэссэдээтэлэ Олег Сидоров туттардылар. Дьоро киэһэни ыыппыт «Чолбон» сурунаал бас эрэдээктэрэ Гаврил Андросов: «Сардаана Корякина – прозаиктартан бастакы лауреат» диэн бэлиэтээтэ. Лауреакка Россия суруйааччыларын сойууһун үрдүкү айар сүбэтин чилиэнэ, норуот суруйааччыта Николай Лугинов алгыс тылын анаан, айар үлэтигэр ситиһиини баҕарда.

Сардаана Корякина, Н.Д. Неустроев аатынан өрөспүүбүлүкэтээҕи эдэр суруйааччылар бириэмийэлэрин 2025 сыллааҕы лауреата: «Бу бириэмийэ эппиэтинэспин үрдэтэр. Ол иһин бу бэлиэ түгэн инникитин үлэни, күүстээх дьаныары эрэйэр диэн ылынабын. Ким эрэ туһугар буолбакка, саха литературатын дириҥ силистээх эйгэтин бар дьон сэҥээрэрин туһугар кыһаллыам», – диэн санаатын үллэстэр.

Санатар буоллахха, лауреат аатын 2020 сыллаахха поэт Николай Васильев-Харыйалаах Уола (Үөһээ Бүлүү), 2021 сыллаахха драматург Надежда Ильина (Дьокуускай), 2022 сыллаахха анал байыаннай дьайыыга баҕа өттүнэн баран сырдык тыынын толук уурбут поэт Василий Рожин-Бронсон (Дьааҥы), 2023 сыллаахха анал байыаннай дьайыы кыттыылааҕа, поэт Анатолий Храмов (Эдьигээн), 2024 сыллаахха драматург Утум Захаров (Таатта) сүкпүттэрэ. Рожинтан уратылара бу бириэмийэттэн кынаттанан Россия суруйааччыларын сойууһугар чилиэнинэн киирдилэр.

Н.Д. Неустроев аатынан өрөспүүбүлүкэтээҕи эдэр суруйааччылар бириэмийэлэрин 2020 сыллаахха, суруйааччы төрөөбүтэ 125 сылыгар, Саха Өрөспүүбүлүкэтин культураҕа уонна духуобунай сайдыыга министиэристибэтин өйөбүлүнэн «Саха сирин суруйааччыта» ассоциация олохтообута. Ассоциация бэрэссэдээтэлэ Олег Сидоров сүрүннээһининэн П.А. Ойуунускай аатынан Литература судаарыстыбаннай музейын, «Чолбон» уонна «Полярная звезда» литература сурунаалларын салайааччыларыттан, суруйааччылартан турар хамыыһыйа лауреаты быһаарара үгэскэ кубулуйда. Бириэмийэ олохтоноругар сүрүн ирдэбили норуот суруйааччыта Николай Лугинов туруорбута – лауреат үрдүк аатын айар сойууска киирэ илик, ситиһиилээх эдэр суруйааччы сүгүөх кэриҥнээх.

«Чолбон» сурунаал