Сардаана Трофимова уонна Евгений Григорьев сэрээккэни ыыттылар

Ыам ыйын 5 күнүттэн Дьокуускайга сарсыардааҥҥы сэрээккэлэр саҕаланнылар. Быйылгы сэрээккэ сезона Кыайыы 80 сылыгар сөп түбэһиннэрэн, «Сарсыардаҕын кыайыыттан саҕалаа — бэйэҕин кыай!» диэн девизтээх.

Аан бастакы сэрээккэ ыытыллар күнүгэр Кыайыы болуоссатыгар куорат мээрэ Евгений Григорьев, физкултуура, успуорт миниистирин солбуйааччы Гаврил Мохначевскай, норуоттар икки ардыларынааҕы успуорт маастара Сардаана Трофимова, куорат дьаһалтатын физкултуураҕа, маассабай успуорка управлениетын салайааччы Роман Оконешников, «Здоровое Отечество» уопсастыбаннай хамсааһын салайааччыта Андрей Петров кыттыыны ыллылар.

— Сарсыарда эрдэ туран, сүрэҕэлдьиири кыайан, чэбдик салгыҥҥа сэрээккэлии тахсыы — бэйэни кыайыы буолар. Хас биирдии күн куораппыт, өрөспүүбүлүкэбит сайдыытыгар саҥа кыайыылары аҕала турдун! — диэн Евгений Григорьев эттэ.

Сардаана Трофимова эрчимнээх хамсаныылары оҥорон, чөмпүйүөннэр сэрээккэлэрин оҥортордо.

Мантан ыла сарсыардааҥҥы сэрээккэлэр күн аайы куорат болуоссаттарыгар сарсыарда 7 чаастан саҕаланыахтара.