Сардаана Трофимова Кыргызстаан Өрөспүүбүлүкэтин Бочуоттаах грамотатынан наҕараадаланна

Сардаана Трофимова Кыргызстаан Өрөспүүбүлүкэтин Бочуоттаах грамотатынан наҕараадаланна. Бу туһунан спортсменка социальнай ситимнэринэн үөрүүлээх сонуну суруйан тарҕатта.

«Наҕараада туттарыыга кыл мүччү тиийдим. Бишкекка сөмөлүөтүнэн сарсыарда 11.30 чааска түспүтүм уонна тутатына Бэрэсидьиэн дьаһалтатыгар тиийбитим. Олус наһаа үчүгэй эбийиэк. Киирэрбитигэр барыбытыттан төлөпүөннэри ылбыттара, онон хаартыскаҕа түһэрбэтим. Онтубут арыый да эрдэ тиийбитим билиннэ. Биһихэ инструктаж ыыттылар, ону таһынан наҕараада туттарыы сиэригэр-туомугар хайдах сылдьарбытын туһунан кэпсээтилэр. Биһигини анал хаартыскаҕа түһэрээччилэр түһэрдилэр, сотору ыытыам, ол кэннэ тэлэбиидиэнньэҕэ уһулбуттара. Түмүгэр олус үчүгэйдик мааны аһынан күндүлээтилэр», — диэн Сардаана Трофимова суруйар.

Кыргызстаан Өрөспүүбүлүкэтин Бочуоттаах грамотатын хаһаайыныгар «Ардак Белги» диэн түөскэ кэтиллэр бэлиэ туттарыллар. Кыргызстаан Өрөспүүбүлүкэтин грамотата уонна бэлиэ социальнай-экэнэмиичэскэй уонна дуохуобунай сайдыытыгар кылаатын иһин туттарыллар.