ВИДЕО: Сардаана Трофимова Азиатскай оонньуулар боруонса призерунан буолла

Саха сирин  сүүрүгэ Сардаана Трофимова Кытайга буола турар Азиатскай оонньууларга боруонса мэтээли ылары ситистэ. Кини бу күрэхтэһиигэ марафоҥҥа Кыргызстан өрөспүүбүлүкэтин аатыттан сүүрдэ. 

Сардаана биэтэккэ Кенияттан төрүттээх Бахрейн сүүрүгэ Эуниче Чумба (2 чаас 26 мүнүүтэ 12 сөкүүндэ) уонна Кытай сүүрүгэ Душин Жаг (2 чаас 27 мүнүүтэ 57 сөкүүндэ) кэннилэриттэн 2 чаас 28 мүнүүтэ 39 сөкүүндэ көрдөрүүлээх үһүс кэллэ.

Азиатскай оонньуулар балаҕан ыйын 23 күнүттэн алтынньы 8 күнүгэр диэри Кытай Ханчжоу буола тураллар. Манна 45 дойду спортсмена кытта кэллэ.

Аны субуотаҕа, алтынньы 7 күнүгэр, көҥүл тустууга күрэхтэһиилэр саҕаланыахтара. Онно Саха сириттэн сылдьар Кыргызстан аатыттан тустар Айаал Лазарев 125 киилэҕэ диэри ыйааһыҥҥа кыттар.