Саргылаана Игнатьева: «Олоххо толору бэлэмнээх исписэлиистэри үөрэтэргэ дьулуһабыт»

Ил Дархан Айсен Николаев Ил Түмэҥҥэ этиитигэр эппит соруктара Арассыыйа национальнай сайдыытын сыалларын ситиһэргэ, нэһилиэнньэни, дьон доруобуйатын уонна чэгиэн буолуутун харыстааһыҥҥа, бэйэ кыаҕын уонна талаанын сайыннарыыга туһуланна.

Бу туһунан Арктикатааҕы култуура уонна ускуустуба институтун ректора  Саргылана Игнатьева бэйэтин санаатын үллэһиннэ:

— Ил Дархан айар индустриялары сайыннарыыга оҥорбут бэлиэтээһиннэрин кытта мин толору сөбүлэһэбин. Култуура уонна ускуустуба института култуура эйгэтигэр үрдүк таһымнаах каадырдары хаачыстыбалаахтык бэлэмнээһиҥҥэ кылаатын киллэрэргэ дьулуһар. Дьокуускайга үрдүк үөрэх кыһаларын кампустарын тэрийии сотору кэминэн үөрэҕирии салаатыгар улахан хамсааһыны таһаарарыгар эрэнэбин.  Мин Ил Дархан ыччаты ураты толкуйдаах гына иитиигэ туһаайбыт санаатын өйүүбүн. Биһиги үөрэххэ бырагыраамаларынан олоххо толору бэлэмнээх исписэлиистэри үөрэтэн таһаарарга дьулуһабыт. Ол инниттэн устудьуон идэтийбит бэлэм портфолиолаах  буолуохтаах. Ыччаттарбыт урбаан эйгэтин баһылыыр дьоҕурдарын эмиэ сайыннарабыт. Онон Ил Дархаммыт Саха сирин инники кэскилэ талааннаах, кыахтаах, барыны бары сатыыр ыччаттан тутулуктаах диэн бэлиэтээһинин кытта толору сөбүлэһэбин.  Маны таһынан, ыччаппытын Ийэ дойдуга бэриниилээх буолар гына иитиибит кэм ирдэбилинэн буолар. 2025 сыл өрөспүүбүлүкэҕэ Ийэ дойдуну көмүскээччи сылынан биллэриллиитэ — төрөөбүт дойдуга тапталы  иҥэриигэ туһуланар. Кэлэр сылга Улуу Кыайыы 80 сылын бэлиэтиэхпит. Бу бэлиэ сылга ыччаты патриоттуу тыыҥҥа иитии  өссө күүһүрүөҕэ.