Саргылаана Нестерева: «Буойуттарга наадалаах анал тэриллэринэн көмөбүт салҕанар»

Байыаннай эпэрээссийэҕэ кытта сылдьар буойуттарга туох көмө, өйөбүл салгыы оҥоһулларын туһунан ХИФУ проректорын солбуйааччыта,  университет иһинэн «#МЫ ВМЕСТЕ СВФУ» ыстаап салайааччыта Саргылаана Нестерева хаһыат саайтын ааҕааччыларыгар кэпсээтэ.

— Билигин төһө да устудьуоннарбыт үөрэхтэрэ бүтэн, преподавателлэр уоппускаҕа тарҕасталлар, ХИФУ иһинэн ааспыт сыл алтынньы ыйыттан тэриллэн үлэлиир «#МЫ ВМЕСТЕ СВФУ” ыстаап үлэтин салгыыр. Уоппускаҕа кэлэ сылдьыбыт кэллиэгэбитин көрсөммүт, киниэхэ тепловизоры, биноклы, анал таҥаһы уонна блиндажнай чүмэчилэри туттарбыппыт. Буойуттарга бу тэриллэр олус наадалар. Университет клиникатын үлэһиттэрэ бойобуой дьайыыларга кыттар байыаннайдарбытыгар тыын суолталаах маскировочнай сетка оҥорор санаалаахтар.

Биһиги «Аҕа дойдуну көмүскээччилэр» диэн байыаннай эпэрээссийэ кыттыылаахтарын өйүүр Судаарыстыбаннай пуонда Саха сиринээҕи филиалын кытта ыкса сибээстээхтик үлэлиибит. Ол курдук, сотору кинилэри кытта буойуттар оҕолоругар аналлаах бырайыагы олоххо киллэриигэ бииргэ үлэлээри, сөбүлэһии түһэрсэри былаанныыбыт.