Сарсын кэккэ улуустарынан тоҥоруу түһэрэ күүтүллэр

Атырдьах ыйын бастакы күнүгэр Саха сиригэр салгын температурата биллэрдик намтыаҕа.

Саха сирин хоту уонна хотугулуу-арҕаа өттүгэр түүнүн тоҥоруулар түһэллэрэ күүтүллэр. Саха сиринээҕи УГМС иһитиннэрэринэн, атырдьах ыйын 1 күнүнээҕи түүнүгэр салгын температурата  +5…+7 С , киин оройуоннарга +4…+9 кыраадыс буолара сабаҕаланар. Өрөспүүбүлүкэ хоту уонна хотугулуу-арҕаа өттүгэр түүҥҥү тоҥоруулар -2С кыраадыска диэри түһүөхтэрэ.

Күнүс Дьокуускайга салгын температурата муҥутаан +15…+17 С кыраадыска диэри тиийиэҕэ, киин оройуоннарга +13…+18 С, соҕуруу +18...+23 С. Хотугулуу-илин уонна хоту диэкки ордук сөрүүн буолуоҕа, күнүс салгын температурата +3…+8 кыраадыска диэри тиийиэ.

Эдьигээн, Кэбээйи, Эбээн-Бытантай, Үөһээ Дьааҥы улуустарыгар сөкүүндэҕэ 15-18 миэтэрэҕэ тиийэ хотуттан дохсун тыаллаах буолара сылыктанар.