Сарсын сардаана бырааһынньыга ыытыллыаҕа

Сарсын, атырдьах ыйын 1 күнүгэр, Дьокуускай куоракка үгэс буолбут, сыл аайы ыытыллар «Северные лилии» бэстибээл саҕаланыаҕа. Бэстибээл Биология институтун Ботаническай саадыгар 1-2 күннэргэ ыытыллыа, кэлбит ыалдьыттар сардаана сибэкки арааһын көрүөхтэрэ.

Кинилэргэ анаан тэрийээччилэр экскурция ыытыахтара, бу кэрэ сибэккилэр тустарынан кэпсиэхтэрэ. Ону таһынан, атырдьах ыйын 4 уонна 5 күннэригэр Арассыыйа билимин академиятын Саха сиринээҕи салаатын былаһааккатыгар анал үөрэхтээх исписэлиистэр сардаананы хайдах үүннэрэр, көрөр, харайар туһунан кэпсиэхтэрэ, маастар-кылаастары ыытыахтара.

Кэлбит ыалдьыттар Саха сиригэр үүнэр сардаана сибэкки араас көрүҥүн быыһыгар хаартыскаҕа түһүөхтэрэ.