Сарсын уонна өйүүн Дьокуускайга “Дьиэ кэргэн улахан өрөбүлэ” буолуоҕа

Бу өрөбүллэргэ Дьокуускай куорат олохтоохторун уонна ыалдьыттарын “Дьиэ кэргэн улахан өрөбүлэ” («Большие семейные выходные») тэрээһиҥҥэ ыҥыраллар.

Үлэ уонна социальнай сайдыы министиэристибэтэ иһитиннэрэринэн, атырдьах ыйын 17 күнүгэр Кырдьаҕас куоракка, култуура уонна сынньалаҥ пааркатыгар, Ю.А.Гагарин аатынан тулаһаҕа, ону тэҥэ, Табаҕа сэлиэнньэтин “Кедр” култуура дьиэтин тэлгэһэтигэр оҕолорго, төрөппүттэргэ аналлаах аралдьытар тэрээһиннэр ыытыллыахтара.

Тэрээһин бырагыраамата:

Атырдьах ыйын 17 күнүгэр Кырдьаҕас куоракка 12.00 ч.: “Кырдьаҕас куорат кистэлэҥэ” дьиэ кэргэҥҥэ аналлаах квест. Дьиэ кэргэҥҥэ Дьокуускай куорат харыстанар сирдэрин архитектурнай уонна историческай пааматынньыктарын  билиһиннэрии.

Атырдьах ыйын 17 күнүгэр култуура уонна сынньалаҥ пааркатыгар 14.00 ч: уулусса аһын баараҕай бэстибээлэ! Эһигини куорат асчыттарын араас аһылыктара, тыыннаах муусука, куонкурустар, маастар-кылаастар күүтэллэр.

Атырдьах ыйын 17 күнүгэр култуура уонна сынньалаҥ пааркатыгар 14.00 ч: Дьиэ кэргэн куораттыы күүлэйэ (пикник).

Атырдьах ыйын 17 күнүгэр Ю.А.Гагарина аатынан тулаһа, күнүс 15.00 ч.: оҕолорго уонна төрөппүттэргэ аналлаах “Биһиги тэлгэһэбит оонньуулара” оонньуу.

Атырдьах ыйын 17 күнүгэр Табаҕаҕа “Кедр” култуура дьиэтин тэлгэһэтигэр күнүс 12.00 ч.: “Өрөбүлгэ дьиэ кэргэнинэн” дьиэ кэргэҥҥэ оонньуу.

Атырдьах ыйын 18 күнүгэр эһиэхэ анаан Дьокуускай куорат Ю.А.Гагарин аатынан тулаһатыгар уонна Тулагыга М.П.Обутова-Эверстова аатынан култуура киинигэр дьиэ кэргэҥҥэ аналлаах оонньуу бырагыраамата күүтэр.

Тэрээһин бырагыраамата:

Атырдьах ыйын 18 күнүгэр Тулагыга М.П.Обутова-Эверстова аатынан култуура киинигэр күнүс 14.00 ч.:«Аҕам, ийэм уонна мин –  иллээх дьиэ кэргэн» оонньуу.

Атырдьах ыйын 18 күнүгэр Ю.А.Гагарин аатынан тулаһаҕа күнүс 15.00 ч.: “Бииргэ буоларбытыттан дьоллоохпут” оҕолор, төрөппүттэр күрэстэрэ.

Умнуллубат өйдөбүлү уонна дьиэ кэргэн сыаннастарын харыстыырга аналлаах “Дьиэ кэргэн улахан өрөбүлэ” федеральнай бырайыакка барыгытын ыҥырабыт. Бу туһунан Ил Дархан уонна Бырабыыталыстыба пресс-сулууспата иһитиннэрэр.