Сарсыҥҥыттан Хаҥалас улууһугар XXIX Н.Г. Соломонов аатынан «Инникигэ хардыы» научнай-практическай кэмпириэнсийэ саҕаланыа

Хаҥалас улууһунааҕы XXIX «Н.Г. Соломонов аатынан Инникигэ хардыы» научнай-практическай кэмпириэнсийэҕэ 322 научнай үлэ киирдэ.

Үгэс буолбут кэмпириэнсийэ сэтинньи 21 күнүгэр «Сферум» платформаҕа ыытыллыаҕа диэн Хаҥалас улууһун үөрэх управлениета иһитиннэрэр. Эдэр чинчийээччилэр бэйэлэрин бырайыактарын экэниэмикэ уонна социальнай эйгэ сүрүн хайысхаларын хабар 38 сиэксийэҕэ билиһиннэриэхтэрэ.

Муниципальнай түһүмэххэ 26 үөрэх тэрилтэтиттэн 322 үлэ киирдэ. Бырайыактары 66 эспиэр сыаналыаҕа – өрөспүүбүлүкэ бастыҥ учуонайдара: билим хандьыдааттара, М.К. Аммосов аатынан ХИФУ кииннэрин уонна лабораторияларын научнай үлэһиттэрэ, доценнар, старшай преподавателлэр, аспираннар.

Улуус кэмпириэнсийэтэ В.П. Ларионов аатынан «Инникигэ хардыы – Professor V. P. Larionov «A Step into the Future” Science Fair» XXX өрөспүүбүлүкэтээҕи научнай кэмпириэнсийэ куонкуруһугар эдэр чинчийээччилэр сүүмэрдиир түһүмэҕинэн буолар.