Сатаҕай эбэҕэ – куйуур

Куйуур кэмэ саҕаланан, тыа сиригэр сэргэхсийии буолла. Ол курдук, нэһилиэктэргэ куйуур күрэстэрэ ыытыллаллара үгэскэ кубулуйда.

Биир оннук тэрээһин бу күннэргэ Мэҥэ Хаҥалас 2 Наахара нэһилиэгэр (баһылык П.Никитин) буолаары турар.  Чуолаан, кулун тутар 23 күнүгэр Сатаҕай эбэҕэ Улуу Кыайыы өрөгөйдөөх 80 сылын көрсө, Арассыыйаҕа Аҕа дойдуну, Саха Өрөспүүбүлүкэтигэр Ийэ дойдуну көмүскээччилэр сылларыгар аналлаах “Куйуур-2025” биирдиилээн күрэс ыытыллыаҕа.

Өссө интэриэһинэйэ диэн, күрэхтэһии кэмигэр оҕолор тоҥуу хаарынан сүүрүүгэ илин-кэлин түсүһүөхтэрэ.

“Кыайыылаахтарга анал ааттар иҥэриллиэхтэрэ. Сааскы чэбдик салгынынан дуоһуйа тыына өбүгэ төрүт дьарыгын – куйуур күрэһин кэлэн сэргээҥ, кыттыҥ”, — дииллэр тэрийээччилэр.

Хаартыска: А.Шестакова (2 Наахара)  архыыбыттан.