Саталга — волейбол бырааһынньыга

Бэҕэһээ, от ыйын 28 күнүгэр, Намныыр суол 14 км тайаан, тэнийэн сытар Сатал түөлбэ олохтоохторун икки ардыларыгар үгэскэ кубулуйбут волейбол бырааһынньыга ыытылынна.

Быйыл номнуо төрдүс сылын тэриллэр күрэхтэһиигэ, уопсайа 5 хамаанда кытынна. Ол курдук, 1, 5, 9 түөлбэ олохтоохторо уонна атын түөлбэлэргэ олорор волейбол сүгүрүйээччилэрэ түмсэн, икки хомуур хамаанданы туруордулар.

Саталга олорор Евдокия Лукачевская Сатал сайдыытын пуондатын тэрийэн, Дьокуускай куорат тупсуутугар бырайыак суруйан, грант кыайан, ол үбүнэн, волейбол фанаттара нэдиэлэ устата үлэлэрин кэнниттэн киэһэ аайы мустан, спортивнай былаһаакка тутуутугар ылсыбыттара. Аналлаах матырыйаалы тэлгэтиэх иннинэ, кумаҕы ыһан, хайыр таас кутан, тимир сиэккэни тэлгэтэн, о.д.а. үлэлэри волейболу таптааччылар соторунан ситэрэн-хоторон, бэлэмнээн кэбиспиттэрэ. Салгыы тутааччы идэлээх дьон бэлэмнэммит бырайыагынан, тып-тап курдук тэлгэтэн, бэҕэһээ Сатал быйылгы волейболга турнира саҥа спортивнай балаһааккаҕа ыытыллар кыахтанна.

Күрэхтэһии балаһыанньатынан бука бары кыттааччылар, Саталга олорор буолуохтаахтар. Сүрүн судьуйанан, былырыын Саталга дьиэ туттан киирбит, өрөспүүбүлүкэҕэ волейбол сайдыытыгар үлэлии-хамсыы сылдьар, СӨ Волейболга федерациятын Президиумун чилиэнэ Айсен Жерготов үлэлээтэ.

Быйылгы күрэхтэһиини тэрийээччилэр мустан сүбэлэһэн, кыттааччыларга бэлэх, бириис көрдөөһүнүгэр күүскэ ылсаннар, Саталга олорор  урбаанньыттары кытта кэпсэтэн, манна маҕаһыыннаах, баазалаах дьон  көмөлөһөргө судургутук ылынаннар, 140000 солк. уу харчынан уонна элбэх сыаналаах бириистэри булан, үөрүүлэрэ муҥура суох.

Түмүккэ, бастакы бириистээх миэстэҕэ, Саха гимназиятын 4-с кылааһын үөрэнээччитэ Айтал Жерготов хапытааннаах, 5-с түөлбэ  олохтоохторо тахсан, уу харчынан ботуччу сууманы туттулар, кыһыл көмүс мэтээли түөстэригэр кэттилэр. Иккис миэстэни, Евгений Жерготов хапытааннаах 9-с түөлбэ спортсменнара ылан, эмиэ харчы бирииһи туттулар, үрүҥ көмүс мэтээли кэттилэр. Үһүс миэстэни, Саталга саамай тэнийэн олорор бастакы түөлбэ олохтоохторо ыланнар, харчы ыллылар уонна боруонса мэтээл хаһаайыннарынан буоллулар.

Итини таһынан, бастыҥ оонньооччулар номинация хаһаайыннарынан быһаардылар. 30-ча кыраадыс итиигэ, оҥоойу быыһыгар күн устата олорон, күрэхтэһиини кэтээн көрбүт уонна кыттыбыт дьон кистэлэҥ куоластааһынынан, “Норуот таптала” номинация хаһаайынынан, улахан дьоннуун тэҥҥэ, таһыччытык оонньообут Айтал Жерготов ааттанна.

9-с түөлбэ олохтооҕо, спортивнай былаһаакка олоххо киирэригэр быһаччы сүүрбүт-көппүт, улахан кылаатын киллэрбит, тутааччы идэлээх Чөркөөх уола Евгений Жерготов үс сыаналаах бирииһин “Лучший защитник” — Юрий Фролов, “Лучший нападающий” — Валерий Нифонов, “Лучший разыгрывающий” — Уйбаан Пермяков туттулар. Итини таһынан, “Лучший разыгрывающий” — Туяра Винокурова, “Лучший нападающий” — Айыына Жерготова, “Лучший защитник” — Ольга Степанова, “Перспективный игрок” — Изабелла Корнилова, “Полезный игрок” — Валерий Новгородов, Екатерина Бястинова ааттанан, харчынан бэлиэтэннилэр. “Көхтөөх дьиэ кэргэн” ааты — Екатерина, Александр Бястиновтар ылан, урбаанньыт Николай Ситников олохтообут сыаналаах бэлэҕин туттулар. Күрэхтэһии бэтэрээн оонньооччутун аатын Эдьигээнтэн төрүттээх Агата Шадрина ылла. Төрдүс, бэһис миэстэ буолбут хамаандалар эмиэ “Тундра” атыы дьиэтэ олохтообут бэлэхтэрин тутан, дьиэлэригэр үөрэн-көтөн тарҕастылар.

Сарсыарда 9 чаастан саҕаламмыт күрэхтэһии киэһэ 6 чаас ааһыыта түмүктэннэ. Куйааһы аахсыбакка, олорор түөлбэлэрин чиэһин көмүскээри, от үлэтин тохтотон кэлбит кыттааччылар эмиэ бааллара. Күрэхтэһии үөрүүлээх аһыллыытын быйыл Сатал ыала буолбут СӨ Үҥкүү судаарыстыбананй тыйаатырын оркестрын артыыһа Виктор Винокуров-Дабайаан, ураты суоллаах-иистээх Киджа кэлэн киэргэттилэр.

Түмүккэ, маннык улахан тэрээһин үрдүк таһымнаахтык ааспытыгар, бука бары көмөлөспүт спонсордарга, олохтоох урбаанньыттарга “Мясной двор” Айаал Макаровка, Леонид Архангельскайга, Александр Намыҥҥа, Тимофей Ивановка, “Кустук” маҕаһыын хаһаайына Анатолий Андросовка, “Тундра” атыы дьиэтин хаһаайына Николай Макаровка, оҕуруот аһын киоскатын хаһаайыныгар, “Мечта” маҕаһыын хаһаайката Дария Бурцеваҕа, “Айта М” — Айталина Матаховаҕа, Сатал дьаһалтатыгар Виталий Шадриҥҥа, Евгений Жерготовка, “Акуленок” аквакулууп олохтообут сэртипикээтин иһин — Денис Емельяновка, “VBGAME 14” маҕаһыын кэлэктиибигэр тэрийээччилэр махтал маанытын тиэрдэллэр.

Күрэхтэһиини тэрийээччилэр маассабай успуорду тарҕатар, чөл олоҕу пропагандалыыр, волейбол курдук кыраһыабай успуорт көрүҥүн сөбүлээччилэр ахсааннара сыл аайы элбээн иһэриттэн улаханнык үөрэбит дииллэр. Онон быйыл сайын биир умнуллубат күнүнэн буолбут волейбол улахан түһүлгэтэ оонньообут уонна тыҥааһыннаах киирсиилэри кэтээн көрбүт дьон өйүгэр-санаатыгар өргө диэри хааларыгар саарбахтаабаппын.