Сатыы сылдьарыттан сүрэҕэлдьээн бэлисипиэт уорбут

Киин куоракка бэлисипиэти уоруу элбээтэ. Бу күннэргэ кэтэх дьиэ уһаайбатыттан  16 000 солк. суумалаах бэлисипиэти уоруу бэлиэтэннэ. Бу туһунан ИДьМ пресс-сулууспата иһитиннэрдэ.

Суһал-көрдүүр дьаһалларынан холуобунай ирдэбил үлэһиттэрэ уорбаланааччыны туттулар. Кини урут сууттана сылдьыбыт 41 саастаах эр киһи  буолара быһаарылынна.

Силиэстийэ быһаарыытынан, уорбаланааччы уулуссанан ааһан иһэн кэтэх дьиэ уһаайбатын иһигэр бэлисипиэт турарын көрбүт. Кини этэринэн, маҕаһыыҥҥа диэри сатыы барарыттан сүрэҕэлдьээн, бэлисипиэти уорарга быһаарыммыт. Ким да көрбөтүнэ уһаайбаҕа киирбит уонна бэлисипиэти күрэппит.

Российскай Федерация Холуобунай Кодексын 2 ч. 158 ыст. холуобунай дьыала тэрилиннэ, уорбаланааччы 5 сылга диэри көҥүлэ быһыллыан сөп.