«Сделано в Якутии» быыстапка-дьаарбаҥкаҕа

Дьокуускайга «Сделано в Якутии» быыстапка-дьаарбаҥка саҕаланна.

«СахаЭкспоЦентр» атыы-эргиэн киинигэр «Сделано в Якутии» быыстапка-дьаарбаҥка саҕаланна. Манна олохтоох оҥорон таһаарааччылар бэйэлэрин бородууксуйаларын куорат олохтоохторугар уонна ыалдьыттарыгар билиһиннэриэхтэрэ. Тэрээһин дойду үрдүнэн урбаанньыт күнүнэн иитинэн ыытылларын туһунан  «Мой бизнес» эрэгийиэннэҕи киин иһитиннэрэр.

Икки күн устата көрөөччүлэр табаар арааһын, ол курдук уус-уран оҥоһуктартан саҕалаан аныгы оҥоһукка тиийэ билсэллэр. Талааннаах маастардары, урбаанньыттары кытта сэһэргэһэллэр.

«Туойтан оҥоһуллубут  оҥоһуктары илдьэ кэллим. Олус долгуйабын. Улахан маастардары кытта бастакыбын кыттабын. Тэрээһин таһыма үрдүк. барыбытыгар ситиһиини баҕарабын», — Мэҥэ Хаҥалас улууһуттан  «Айар кут» гончарнай мастарыскыайдаах Марина Оконешникова санаатын үллэстэр.

Быыстапка ыам ыйын 30 күнүгэр диэри ыытыллыаҕа. Тэрийээччи — СӨ урбаан, атыы-эргиэн уонна туризм министиэристибэтэ, ону сэргэ «Мой бизнес»уонна ХЭТ «Виктория-плюс».

«Мой бизнес» эрэгийиэннээҕи киин урбаанньыттары  «Эффективная и конкурентная экономика» диэнинэн өйүүр. Тэрээһин туһунан уонна өйөбүл миэрэлэрин туһунан: Телеграм, ВКонтакте, Одноклассники, Мойбизнес14.рф порталга, ону сэргэ суһал лииньийэ нүөмэригэр: 8(800)100-58-80 эрийэн билсиэххэ сөп.