М.Е.Николаев оскуолаларын ситимин XXVIII олимпиадатыгар Нам  улууһун гимназията бастаата

Бу күннэргэ А.Е.Мординов аатынан Таатта лиссиэйигэр Саха судаарыстыбаннай университетын төрүттээччи, тэрийээччи, бастакы ректор Авксентий Егорович Мординов төрөөбүтэ 115 сылыгар уонна Аҕа дойду сэриитигэр Улуу Кыайыы 80 сылыгар аналлаах, СӨ бастакы бэрэсидьиэнэ М.Е.Николаев оскуолаларын ситимин үөрэнээччилэрин “Күүспүт – сомоҕолоһууга!” бэстибээллэрэ буолан ааста.    

Бэстибээл сүрүн тэрээһининэн Бэрэсидьиэн оскуолаларын ситимин саха, нуучча, аангылыйа тылларыгар, тиэхиньиичэскэй, естественнэй-научнай, информационнай-технологическай хайысхаларыгар уонна 3D-моделированиеҕа ыытыллар XXVIII олимпиада буолла.

Зачекка киирэр иккис тэрээһин – билим-быраактыка кэмпириэнсийэтэ. Манна “Тиэхиньиичэскэй билим” хайысхаҕа кыайыылааҕынан Бэрдьигэстээх улуустааҕы гимназиятыттан Василий Старостин, Чурапчы улуустааҕы гимназиятыттан Аман Сивцев, Амма лиссиэйиттэн Владислав Петров таҕыстылар. “Естественнэй билим эйгэтэ” хайысхаҕа Мүрүтээҕи уолаттар гимназияларыттан Айаал Васильев, Майа лиссиэйиттэн Андриана Зыкова, Таатта лиссиэйиттэн Николай Лазарев бастаатылар.

Зачекка киирэр икки тэрээһин түмүгүнэн муҥутуур кыайыылааҕынан Нам улуустааҕы гимназиятын хамаандата бастаата, иккис миэстэни Бэрдьигэстээх улуустааҕы гимназиятын хамаандата ылла, үсүһү Ньурбатааҕы тиэхиньиичэскэй лиссиэй уонна Таатта лиссиэйин хамаандалара үллэһиннилэр.

Бу туһунан “Николаев киин” иһитиннэрэр. Салгыы манна ааҕыҥ.