СӨ Бырабыыталыстыбата үлэтэ суохтарга социальнай мэктиэлэрин салгыы өйүөҕэ

Өрөспүүбүлүкэ үс сыллааҕы судаарыстыбаннай бүддьүөтүн дьүүллэһии чэрчитинэн, «Саха Өрөспүүбүлүкэтин нэһилиэнньэтин дьарыктаах буолуутугар көмөлөһүү» судаарыстыбаннай бырагыраама үбүлээһинэ биллэ улаатара былааннанар, диэн www.sakha.gov.ru иһитиннэрэр.

2026 сылга бүддьүөттэн көрүллүбүт үп-харчы кээмэйэ 1 170,2 мөл. солкуобай буолуоҕа. Бу 2025 сылга анаан урут бигэргэтиллибит кээмэйтэн 338,6 мөл. солкуобайынан (40,7%) үрдүк. «Үп-харчы сүрүн эбиллиитэ саҥа федеральнай бырайыактар саҕаланыыларынан сибээстээх. Ол курдук, 2026 сылга «Үлэ ырыынагын салайыы» бырайыак (үбүлээһинэ 353,4 мөл. солк.) уонна «Дьарыктаах буолууга көмөлөһүү» бырайыак (29,0 мөл. солк.) олоххо киириилэрэ саҕаланыа. Ону таһынан, үлэтэ суох гражданнарга социальнай төлөбүрдэргэ ороскуот 345,7 мөл. солкуобайга диэри улаатыа», – диэн СӨ Үп миниистирин эбээһинэһин толорооччу Иван Алексеев чопчулаата.

Саха Өрөспүүбүлүкэтин судаарыстыбаннай бүддьүөтэ 6 стратегическай сыалы  ситиһиигэ туһаайыллыбыт 27 судаарыстыбаннай бырагырааматтан уонна бырагыраамаҕа киирбэт чаастартан турар. Саха сирин 2026 сыллааҕы судаарыстыбаннай бүддьүөтүн ороскуотун уопсай кээмэйэ 317 339,7 мөл. солкуобай таһымыгар быһаарылынна. Бу кээмэй 2025 сыллааҕы бүддьүөт бастакы ааҕыытыгар бигэргэтиллибит ороскуот көрдөрүүлэриттэн 23 296,8 мөл. солкуобайынан үрдүк.

Алтынньы 22 күнүгэр Ил Түмэн XIV (уочараттаах) пленарнай мунньаҕар дьүүллэһии түмүгүнэн, норуот дьокутааттара «Саха Өрөспүүбүлүкэтин 2026 сылга уонна 2027, 2028 сыллардааҕы былааннаах кэмигэр судаарыстыбаннай бүддьүөтүн туһунан» сокуон барылын бастакы ааҕыыга ылыннылар.