Чокуур Гаврильев хаартыската
Бүгүн, кулун тутар 6 күнүгэр, Дьокуускай куоракка, Ю.А. Гагарин аатынан култуура уонна ускуустуба киинигэр СӨ Бырабыыталыстыбатын 2022 сыллааҕы отчуотун түмүктүүр мунньаҕа буолан ааста.
Бырабыыталыстыба нэһилиэнньэҕэ отчуотун түмүктүүр мунньаҕы Өрөспүүбүлүкэ Бырабыыталыстыбатын Бэрэссэдээтэлэ Андрей Тарасенко иилээн-саҕалаан ыытта.
Түмүгү таһараар мунньахха Дьокуускай олохтоохторо, уокуруктар бэрэстэбиитэллэрэ, уопсастыбанньыктар, киин куорат салалтата,о.д.а кытыннылар. Мунньахха кыайан кэлбэтэхтэр, ситим нөҥүө көрдүлэр-иһиттилэр.
Санатан эттэххэ, СӨ ситэриилээх былааһын ааспыт сыллааҕы отчуота олунньу 6 күнүттэн кулун тутар 2 күнүгэр диэри өрөспүүбүлүкэ бары улуустарынан, нэһилиэктэринэн ыытылынна. Бу дьаҥ кэнниттэн үс сылга бастакы сирэй көрсөн, «атах тэпсэн олорон» кэпсэтии буолар.
Киирии тылы Дьокуускай куорат баһылыга Евгений Григорьев эттэ. Кини толору саала киһи мустубутунан астыммытын биллэрдэ. Киин куорат уокуруктарынан сылдьан нэһилиэнньэ иннигэр отчуоттаабытын эттэ.
«Дьокуускай куорат олохтоохторо биһиги ааспыт 2022 сыллааҕы үлэбит-хамнаспыт түмүгүн сөпкө сыаналаабыттарыттан үөрдүм.
Биһиги маннык түмүгү өрөспүүбүлүкэбит салалтата улаханнык өйөөн уонна национальнай бырайыактары олоххо киллэрэн ситистибит», —диэн куорат баһылыга Евгений Григорьев эттэ.
Мэр салгыы ааспыт сылга Дьокуускай куоракка туох улахан үлэ ыытыллыбытын, төһө эбийиэк тутуллан киирбитин, төһө өрөмүөннэммитин, о.д.а кэпсээтэ.
Салгыы тылы Өрөспүүбүлүкэ Бырабыыталыстыбатын Бэрэссэдээтэлэ Андрей Тарасенкоҕа биэрдэ. Кини ааспыт сыллааҕы отчуоту түмүктүүр мунньах Дьокуускай куоракка бүгүн буолбута улахан суолталаах диэтэ. «Биһиги Дьокуускайбыт атын куораттар, холобур, Казань, Уфа курдук кыраһыабай буолуон баҕарабыт. Ол иһин Ил Дархан тапталлаах куораппытын саҥаттан сайыннаран, саамай кыраһыабай буоларыгар үлэлиирбитигэр сорук туруорар. Биһиги бары куораппыт устун хаамабыт, көрө-билэ сылдьабыт, баҕар биһиги сыыһалаах-халтылаах буолуохпутун эбэтэр атыннык оҥоруохпутун сөп, ону эһиги бүгүҥҥү санааҕытыттан билиэхпит, инники хайысхалары торумнуурга, куораппытын сайыннарарга туһаныахпыт», — диэтэ Андрей Тарасенко.
Ааспыт сыллааҕы үлэ-хамнас туһунан уһун-киэҥ отчуоту СӨ инновацияҕа, цифровой сайдыы уонна инфокоммуникационнай технология миниистирэ Анатолий Семенов кэпсээтэ.
Санатар буоллахха, Ил Дархан Айсен Николаев 2021 с. «СӨ киин куората – Дьокуускай куорат 2032 сылга диэри сайдыытын туһунан» ыйаахха илии баттаабыта. Былырыын ол чэрчитинэн, Дьокуускай куорат маастар-былаана оҥоһуллубута. Бырайыак олоххо киирэригэр 10 млрд. кэрийҥэ үп көрүллүбүтэ.
Тохсунньу 9 күнүгэр Уус Алдан улууһугар Мүрүгэ "Түһүлгэ" киин балаҕан-дьиэтигэр Саха Өрөспүүбүлүкэтин Суруйааччыларын сойууһун чилиэнэ,…
Доруобай буолуу төрдө. Тыыныынан эмтэнии биир саамай былыргы ньымата -- хатха-йога. Биһиги кэммитигэр биир сиргэ…
Күн-дьыл билгэтин төһө билэҕитий? Бу туһунан И.М.Сосин "Күн-дьыл билгэтэ" кинигэтигэр сиһилии суруллар. Тымныы кыһын буоларыгар:…
Дьааҥы улууһун Арыылаах орто оскуолатын саха тылын, литэрэтиирэтин учуутала, РФ уопсай үөрэхтээһинин туйгуна Петр Слепцов…
Ахсынньыга Дьокуускайга оҕолорго уонна ыччаттарга I өрөспүүбүлүкэтээҕи төрүт култуураҕа чөмпүйэнээт буолан ааспыта. Төрүт сахалыы эйгэни…
Сахалар билгэлэрэ Сахалар итэҕэллэринэн киэһэ таһырдьа улаханнык саҥарыа, айдаарыа суохтааххын, сир иччитин кыыһырдыаххын сөп. Түүн…