СӨ Быыһыыр сулууспата cуолга сэрэхтээх буоларга ыҥырар

2024 сыл тохсунньутугар СӨ Быыһыыр сулууспата массыына суоппара уонна пассажирдар ыксаллаах быһыыга-майгыга түбэспиттэрин туһунан ыҥырыыга 14 аварийнай-быыһыыр үлэни ыыппыт. Хаар харгыска түбэһии, массыына суол ортото алдьаныыта, суол саахала курдук быһылааннар буолбуттар. Уопсайа бу ыҥырыыларга 41 быыһааччы үлэлээбит.

СӨ Быыһыыр сулууспата суолга турунуох иннинэ массыына туругун үчүгэйдик көрүнэргэ ыҥырар. Күн-дьыл туругун эрдэттэн билэн, суол быраабылатын тутуһан айааннааҥ диир. Итиэннэ ыраах айаҥҥа өйүө ас, испиискэ, банаар, сылаас таҥас илдьэ барар ордугун сэрэтэллэр.

Ыксаллаах быһыы-майгы үөскээтэҕинэ «112» эбэтэр 8 (4112) 45-90-19 төлөпүөннэргэ эрийэн көмөтө көрдөөҥ.