Ил Дархан чэпчэтиилээх эминэн хааччыйыыны бигэтик үбүлүүргэ сорудахтаата

Ил Түмэҥҥэ туһаайан этиитигэр өрөспүүбүлүкэ баһылыга Айсен Николаев чэпчэтиилээх эминэн хааччыйыыны бигэтик үбүлүүр соругу туруорда. Өрөспүүбүлүкэ баһылыга бэлиэтээбитинэн, быйыл үгүс дьоҥҥо чэпчэтиилээх эминэн-томунан хааччыйыыга улахан кыһалҕа баар.

«2026 сылга судаарыстыбаннай бүддьүөккэ ити сыалларга 3,8 млрд солкуобай көрүлүннэ, ол быйылгытааҕар 1,2 млрд солкуобайынан элбэх. Бырабыыталыстыба үбүлээһин кээмэйин кыччаппакка, бигэтик уонна кэмигэр кэлэрин хааччыйыахтаах. Маннык сыһыан санитарнай авиацияны үбүлээһиҥҥэ эмиэ тутуһуллуохтаах, онно 2,6 млрд солкуобай көрүлүннэ. Бу 2025 сылга тэҥнээтэххэ икки төгүл кэриҥэ улаатыы буолар. Уустук кэмҥэ, эбиитин биһиги кытаанах усулуобуйабытыгар, ити боппуруостар өрөспүүбүлүкэ бары олохтоохторугар олоххо суолталаахтар», – диэн Айсен Николаев эттэ.

Саха сиригэр 2025 сылга чэпчэтиилээх эминэн-томунан хааччыйыы бырагырааматынан 198 тыһыынчаттан тахса киһи хабыллыбыт. Бу өрөспүүбүлүкэ олохтоохторун 19% кэриҥэ буолар. Кинилэртэн 70-тан тахса тыһыынча киһи эминэн-томунан хааччыллыыга федеральнай чэпчэтиилээх. Дойду Бэрэсидьиэнэ Владимир Путин «Быһа сибээс» кэмигэр, чааһынай эмтиэкэлэргэ чэпчэтиилээх эмтэр бигэ сыананан атыыланыахтаахтарын бэлиэтээбитэ.

«Бу олус суолталаах, ону доруобуйа харыстабылын министиэристибэтин сөптөөх хонтуруоллуур уорганнара уонна атын хонтуруоллуур тэрилтэлэр сөптөөхтүк кэтииллэрэ наада», – диэн судаарыстыба баһылыга  бэлиэтээтэ.