СӨ Ил Дарханын Гранын куонкуруһун түмүгэ билиннэ

Саха Өрөспүүбүлүкэтигэр гражданскай уопсастыбаны сайыннарыыга СӨ Ил Дарханын Гранын куонкуруһун түмүгэ таҕыста. Бу туһунан Ыччат министиэристибэтин пресс-сулууспата иһитиннэрэр.

Быйылгы куонкуруска барыта 388 сайаапка киирбит. Куонкурус түмүгүнэн дьүүллүүр хамыыһыйа 67 бырайыагы талбыт. Бырайыактарынан көрдөнүллүбүт  үбүлээһин сумата 616 759 446,98 солкуобайы куоһарбыт. Санаттахха, Ил Дархан Граныгар уопсайа 93 666 778,47 солк. үп-харчы көрүллүбүтэ. Кыайыылаах бырайыактар олоххо киириилэрэ 2026 сыл тохсунньу 1 күнүттэн саҕаланыаҕа.

«Куонкурус бары кыттыылаахтарыгар көхтөөхтөрүн иһин махталбытын тиэрдэбит. Хас биирдии сайаапка Саха сирин гражданскай уопсастыбатын сайдыытыгар сыаналаах кылаатынан буолар. Кыайыылаахтары ылыммыт өйөбүллэринэн эҕэрдэлиибит уонна туруорбут бырайыактарын ситиһиилээхтик олоххо киллэриэхтэрин баҕарабыт!», – диэн «НКО Якутии» ВКонтакте официальнай бөлөҕө суруйар. Грант ылааччыларын испииһэгин бу сигэнэн киирэн билсиэххитин сөп.