СӨ Бырабыыталыстыбатын бэрэссэдээтэлин солбуйааччы Сергей Местников бэҕэһээ Ньурбаҕа оробуочай сырыытын кэмигэр, СӨ норуоттарын IX спортивнай оонньууларын тэрийэн ыытар кэмитиэт сүбэ мунньаҕын салайан ыытта.
СӨ спордун миниистирэ Леонид Спиридонов, улуус баһылыга Алексей Иннокентьев 2027 с. Ньурбаҕа буолар бу улахан күрэхтэһиигэ бэлэмнэнии туһунан иһитиннэрии оҥордулар. Өрөспүүбүлүкэ бары улуустарыттан 5 тыһ. кэриҥэ спортсмен кэлиэҕэ, 15 көрүҥҥэ күрэхтэһиилэр буолуохтара. Күрэхтэһиилэри көрсө элбэх эбийиэк, ол иһигэр Ньурбаҕа 3 тыһ. миэстэлээх стадион, бассыайыннаах физкултуурунай-чэбдигирдэр комплекс, Антоновкаҕа спорт саалата, Күндээдэҕэ (номнуо тутулла турар), Сүлэҕэ, Чаппандаҕа спорт саалалара уо.д.а. эбийиэктэр тутуллаллара былааннанар.
Сүбэ мунньахха биирдиилээн эбийиэктэринэн сиһилии дьүүллэстилэр. Онлайн көрүҥүнэн өрөспүүбүлүкэ министиэристибэлэрин салайааччылара кытыннылар.
2023 с. өрөспүүбүлүкэ бүддьүөтүгэр Ньурба куоракка 3 тыһ. миэстэлээх стадион тутуутун саҕалыырга, 2024 с. бүтэрэр курдук үбү көрөргө быһаарылынна. Бассыайыннаах физкултуурунай-чэбдигирдэр комплекс тутуутун федеральнай бырагыраамаҕа 2024-2026 сс. киллэртэрии былааннанар, СӨ Спордун министиэристибэтэ РФ Спордун министиэристибэтин кытта эбии сөбүлэһии түһэрсэн үлэлииригэр сорудахтанна. Атын даҕаны эбийиэктэргэ эмиэ чопчу быһаарыылар ылылыннылар. Бу аҥаардас спорт эрэ эбийиэктэринэн муҥурдаммат, үөрэх, култуура, суол хаһаайыстыбатын эбийиэктэрэ эмиэ бааллар. Ол иһигэр Ньурба 3 №-дээх уонна Убайаан оскуолатын, Антоновкаҕа 280 миэстэлээх начаалынай оскуола дьиэтэ уонна 150 миэстэлээх оҕо уһуйаана, Маарга норуот айымньытын дьиэтэ уо.д.а. Ньурба к. күүтүүлээх балыыһа 2-с уочаратын бырайыактааһыҥҥа уонна тутууга куонкурус сэтинньи 25 күнүгэр биллэриллэн турар.
Алексей Иннокентьев Куоначчаан муостатын туттарар инниттэн муниципальнай суолу өрөспүүбүлүкэ бас билиитигэр биэрэргэ туруоруста. Сергей Местников СӨ Тырааныспарын уонна суол хаһаайыстыбатын министиэристибэтэ Ньурба улууһун салалтатын ыҥыран дьүүллэһэн, сөптөөх быһаарыыны булан, СӨ Бырабыыталыстыбатыгар сөбүлэһиннэриигэ киллэрэригэр сорудахтаата.
Сергей Васильевич түмүк тылыгар федеральнай үбүлээһиҥҥэ кыттыахтаах эбийиэктэр кэрискэлэрэ чуолкайдаммытын, Ньурбаҕа СӨ норуоттарын IX Спортивнай оонньууларыгар диэри 4 сылтан ордук кэм баарын, онон үчүгэйдик бэлэмнэнэр кыах баарын, федеральнай бырагыраамаларга барытыгар сайаапкалаһан киириллиэхтээҕин, эбийиэктэр суумаларын аҥаарын кэриҥэ федеральнай үптэн тардыллыахтааҕын бэлиэтээтэ. Күрэхтэһиини бу иннинээҕи Оонньуулартан уратылаах уонна креативнай буоларын курдук, Уһук Илин сүүмэрдэммит хамаандатын ыҥыран зачету таһынан кытыннарыыны холобурдаан этии киллэрдэ.
Улуус дьаһалтатын пресс-сулууспата.
Орто Халыма улууһун Хатыҥнаах нэһилиэгин олохтоохторо, төһө да хаар уулла илик буоллар, бүгүҥҥү бырааһынньыктарын "Дорообо,…
Бүгүн Горнай улууһун Бэрдьигэстээҕэр Эйэ, Үлэ, Маай бырааһынньыгын күнүгэр үлэ кэлэктииптэрин икки ардыларыгар үлэ күрэҕэ…
Бүгүн, ыам ыйын 1 күнүгэр, киин куоракка "Дорообо, Күөх Маай!" диэн бырааһынньыктааҕы үөрүүлээх тэрээһиннэр буола…
Ыам ыйын 15 күнүттэн Арассыыйаҕа саҥа сокуон олоххо киириэҕэ. Ол курдук, сураҕа суох сүппүт дьон…
Муус устар 27-28 күннэригэр Калининградка 15 саастарыгар диэри саастаах дзюдоистарга Арассыыйаҕа бастыыр иһин күрэхтэһии ыытылынна.…
Ил Дархан Айсен Николаев сорудаҕынан, "Бочуоттаах настаабынньык" диэн судаарыстыбаннай наҕараада олохтонно. Үлэ, социальнай сайдыы министиэристибэтэ…