“СӨ сыл учуутала-2025” идэ күөн күрэһин ыытыы болдьоҕун, бэрээдэгин бигэргэттилэр 

“Арассыыйаҕа сыл учуутала” Бүтүн Арассыыйатааҕы күөн күрэс эрэгийиэннээҕи түһүмэҕэ Дьокуускай куоракка 2025 сыл ахсынньы 8-12 күннэригэр буолуоҕа.

Күөн күрэс өрөспүүбүлүкэ уопсай үөрэхтээһинин талааннаах педагогтарын булар, өйүүр соруктаах ыытыллар. Үс сылтан итэҕэһэ суох педагогическай ыстаастаах учууталлар кытталлар.

Күөн күрэс икки түһүмэҕинэн, олоҕурбут көрүҥүнэн барар. Бастакы түһүмэх икки тургутууттан турар: «Уруок» уонна «Педагогическай интервью». Бастакы түһүмэх түмүгүнэн 15 лауреаты талаллар, кинилэр иккис түһүмэххэ тахсаллар.

Иккис түһүмэх үс тургутууттан турар: «Маастар-кылаас», «Блицтурнир» уонна “Үөрэххэ умсугуйуу” (образовательный форсаж”).

Икки түһүмэх кэнниттэн биэс-алта миэстэлэспит кыттааччыны быһаараллар.  Эриэйтин испииһэгинэн бастакы миэстэни ылбыт киһи кыайыылааҕынан ааттанар. Кыайыылаах туһунан бүтэһиктээх быһаарыыны тоҕус киһиттэн турар улахан дьүүллүүр сүбэ быһаарар: үс оскуола үөрэнээччитэ, үс педагогика идэтигэр үөрэнэр устудьуон уонна педагог идэтиттэн атын эйгэҕэ үлэлиир үс төрөппүт. Итини тэҥэ, дьүүллүүр сүбэҕэ ааспыт сылларга “Арассыыйатааҕы сыл учуутала” Бүтүн Арассыыйатааҕы күөн күрэс финалистара кытталлар. Бу туһунан Үөрэх уонна билим министиэристибэтин саайтыгар суруйаллар. Сиһилии манна ааҕыҥ.