СӨ Үрдүкү суута урукку военкому 6 мөл.солк. ыстарааптаата

СӨ Үрдүкү суута аппеляционнай бэрээдэгинэн Дьокуускай куорат урукку военкомун дьыалатын хаттаан көрдө. Бу туһунан СӨ Үрдүкү суутун пресс-сулууспата суруйар.

Дьокуускай куорат суутунан былырыын ахсынньы 12 күнүгэр 50 саастаах военком бэриги ылыыга буруйдааҕынан ааҕыллыбыта. Буруйу оҥорууга бүтэһиктээх быһаарыынан военком 10 сылга болдьоххо көҥүлэ быһыллыбыта, ону таһынан 10 сыл устата судаарыстыбаннай сулууспаҕа уонна олохтоох салайыныы уорганнарыгар үлэлииргэ көҥүлэ быһыллыбыта. Ону тэҥэ буруйдаахтан судаарыстыба дохуотугар 892 000 солк. ирдэммитэ. Урукку военком суут саалатыттан тутуллан хаайыллыбыта. Ити кэннэ борокуруортан үрдүкү инстанцияҕа апелляционнай көрдөһүү сурук уонна үҥсүү киирбит.

СӨ Үрдүкү суута холуобунай дьыала матырыйаалларын көрөн, Дьокуускай куорат суутун бириигэбэрин уларытта уонна накаастабылын күүһүрдэн биэрдэ. Урукку военком 6 000 000 солк. суумаҕа ыстарааптанна уонна «подполковник запаса» анал байыаннай званиетын сүтэрдэ. Бириигэбэр сокуоннай күүһүгэр киирэ илик.