Сэбиэскэй кэм суоппардарын умнубаттар

Бүгүн Суоппар күнүнэн үгүс эр дьон эҕэрдэ бастыҥын туталлар. 

Хаҥалас улууһун Хоточчу нэһилиэгин бибилэтиэкэрэ Лира Яндреева биир дойдулаахтарын, өр сыл суоппарынан үлэлээбит бырааттыы Заболоцкайдар тустарынан маннык кэпсиир:

— Хаҥалас улууһун олохтоохторун, массыына уруулун эрэллээхтик туппут, ыраах айаҥҥа сылдьыбыт суоппар идэлээх бииргэ төрөөбүт Владимир уонна Петр Заболоцкайдары биһиги эргин билбэт киһи суоҕун кэриэтэ.
Владимир Заболоцкай — үлэ бэтэрээнэ, «Коммунистическай үлэ ударнига»  бэлиэ хаһаайына, сэбиэскэй кэминээҕи үлэһит буолан, үлэтигэр сүрдээх эппиэтинэстээхтик, ирдэбиллээхтик сыһыаннаһар, кэмиттэн кэмигэр массыынатын көрүнэ сылдьар суоппар этэ. Бастаан «ГАЗ-53» массыынаҕа, онтон «ПАЗ» оптуобуска олорбута. 

1989 сылтан «ЗИЛ»-га суоппардаабыта. Үлэтигэр эппиэтинэстээх, суол саахалын биирдэ да таһаарбатах, түргэн-тарҕан туттунуулаах суоппары «Октябрь 50 сыла» сопхуос салалтата  эрэнэн, элбэхтик  ыраах айаҥҥа, Неверга тиийэ, таһаҕас тастара ыытара. Истиҥник саныыр киһибит билигин биһиги ортобутугар суох. 

Петр  Заболоцкай — үлэ бэтэрээнэ. Билигин Дьокуускай куоракка төһө да бочуоттаах сынньалаҥҥа олордор, харабылга үлэлиир. 

1987 сылтан бэтэринээринэй сулууспа массыынатыгар суоппарынан киирэн, «ЗИЛ» массыынаҕа өр сыл үлэлээбитэ. Кэлин сопхуос оптуобуһугар суоппардаабыта.
Бырааттыы Заболоцкайдар  ханнык да тиэхиньикэни энчирэппэккэ билэр  буолан, үгүс дьоҥҥо үтүө сүбэһитинэн буолаллара. Элэккэй сыһыаннаах, кэпсэтинньэҥ, бэһиэлэй кэпсээннээх суоппардарга олорсубут дьон, айан уһунун да билбэккэ хаалаллара. Оннук норуот дьоно этилэр — урукку кэм суоппардара.

Ити курдук, сэбиэскэй кэм суоппардарын биир дойдулаахтара умнубаттар.