Сэбиэскэй Сойуус Дьоруойа Федор Охлопков кэриэһигэр Бүтүн Арассыыйатааҕы ыраахтан ытыыга иккис күрэхтэһии түмүктэннэ

Алтынньы 12-13 күннэригэр Дьокуускай куоракка Сэбиэскэй Сойуус Дьоруойа Федор Охлопков кэриэһигэр Бүтүн Арассыыйатааҕы ыраахтан ытыыга иккис күрэхтэһии ыытылынна.

Бүгүн, алтынньы 13 күнүгэр, түмүктүүр күн үүннэ. Икки күннээх күрэхтэһиигэ ытааччылар квалификация, «День», «Ночь» түһүмэххэ кытыннылар. Күн-дьыл уларыйыыта, хаардаан-ардахтаан да, тыалыран да ыллар, бүтэһик күн күннэнэн чаҕылыйда. Күрэхтэһии уопсай бирииһин пуондата 18 мөлүйүөн солкуобай. Икки күн устата 140-тан тахса ытааччы, өрөспүүбүлүкэ араас улуустарыттан, дойду араас муннуктарыттан гражданскай дьон,  анал байыаннай дьайыы кыттыылаахтара, байыаннайдар түүннэри-күнүстэри ытыыга күрэхтэстилэр.

Иккис күн эбиэт кэннэ Сэбиэскэй Сойуус Дьоруойа Федор Охлопков кэриэһигэр Бүтүн Арассыыйатааҕы ыраахтан ытыыга иккис күрэхтэһии кыайыылаахтарын чиэстээтилэр. Үөрүүлээх тэрээһини РФ Бырабыыталыстыбатын Бэрэссэдээтэлин солбуйааччы-Уһук Илин боломуочуйалаах бэрэстэбиитэлэ, турнир кылаабынай судьуйата Юрий Трутнев, Ил Дархан Айсен Николаев уонна Арассыыйа Дьоруойа, гвардия майора, кылаабынай судьуйа солбуйааччыта Ярослав Якубов ыыттылар.

«Биһиги турнир түмүгүн таһараар кэммит тиийэн кэллэ. Биһиги Саха сирин талбыппыт ордук – өрөспүүбүлүкэ снайпердары үүннэрэн таһаарар үтүө үгэстээх. Бу сырыыга Саха сирин ытааччыларын түмүгэ ааспыт күрэхтэһиитээҕэр мөлтөх. Ол эрээри ол тугу да эппэт. Күрэхтэһии ытааччылар сайдар уонна инники күөнү былдьаһар кыахтарын үөскэтэр. Бу күрэхтэһии көмөтүнэн дойдубутугар өссө элбэх үрдүк кылаастаах ытааччылары бэлэмниэхпит, эдэр дьон байыаннай-спортивнай бэлэмнэниигэ интэриэстээх буолуохтара, ол аата снайпер маастарыстыбатын таһыма үрдүөҕэ, Ийэ дойдубут кыаҕырыаҕа», – диэтэ Юрий Трутнев.

«Сэбиэскэй Сойуус Дьоруойа Федор Охлопков кэриэһигэр Бүтүн Арассыыйатааҕы ыраахтан ытыыга иккис турнир ситиһиилээхтик ааста. Бу сырыыга икки төгүл элбэх киһи кэлэн кытынна. Бастакы турнирга тахсыбыт алҕастары барытын туораппыппыт. Тэрийэр кэмитиэт үлүгэрдээх улахан үлэни ыыппытын көрбүт буолуохтааххыт. Кэлэр турнирдар эмиэ биһиэхэ ыытыллыахтара уонна саамай үрдүк таһымҥа. Бу күрэхтэһии кыттыылаахтара, күн-дьыл туругун аахсыбакка үчүгэй көрдөрүүнү ситистилэр, ол – биһиги Сахабыт сиригэр уонна бүтүн Арассыыйа үрдүнэн өбүгэлэрбит үгэстэрэ салҕанарын туоһулуур », — диэтэ Айсен Николаев.

Оттон түмүк маннык буолла. «Ночь» түһүмэх үһүс миэстэтин «Колпачок» позывнойдаах снайпер уонна «Воха» позывнойдаах корректировщик ыллылар. Иккис миэстэни эмиэ бу түһүмэххэ «Хантер» уонна «Крид» пааралара ылла. Бастакы миэстэҕэ «Ночь» түһүмэххэ «Брат» уонна «Кос» позывнойдаах ытааччылар таҕыстылар.

«День» түһүмэххэ үһүс миэстэ – «Агроном» уонна «Юрич», иккис миэстэ – «Нагирнай» уонна «Бочаров», бастакыны – «Колпачок» уонна «Воха» ыллылар.

Икки түһүмэх үһүс миэстэлэрин ылбыт пааралар дойду оҥорон таһаарбыт «Аркуда» бинтиэпкэтинэн наҕараадаланнылар. Иккис миэстэни ылбыттар «ЯКТ Сокол» собуот оҥорон таһаарбыт «Сокол» вездеходун күлүүһүн туттулар. Оттон уһулуччу кыайыылаахтар пикап массыынанан наҕараадаланнылар.

Икки түһүмэх түмүгүнэн Бойобуой снайпинг федерациятыттан уонна сэрии сэбин-сэбиргэлин оҥорооччулартан анал бириистэр: Lobaev Arms, ORSIS, «Russian Solid», уо.д.а. туттарылыннылар.

Тиихэй акыйаан флотун 155-с туспа гвардейскай байыаннай биригээдэтигэр Юрий Трутнев Raptor бинтиэпкэни тиксэрэллэригэр туттарда.

«Бу бириис Тиихэй акыйаан флотун 155-с туспа гвардейскай байыаннай биригээдэтигэр барыаҕа. Бу биригээдэ хамандыырдарын, саллааттарын кытта байыаннай дьайыы бара турар сиригэр хаста да көрсүбүппүт. Биригээдэ саллааттарынан уонна хамандыырдарынан киэн туттабын. Кинилэр иннилэригэр кыайыы кэтэһэр – Кыайыыны ситиһэллэригэр эрэнэбин», – диэтэ Юрий Трутнев.