От ыйын 25-27 күннэригэр Мэҥэ Хаҥалас улууһун Сыымах сэлиэнньэтигэр Сэбиэскэй Сойуус Дьоруойун аатын ылбыт саха норуотуттан бастакы байыас Фёдор Попов хорсун быһыытыгар анаммыт «Дьоруой суола» диэн спортивнай-патриотическай марафон буолан ааста.
Марафон бырагырааматыгар тыа сирин үгэс буолбут күрэхтэһиилэрэ — от охсуута, ынах ыаһына уонна кутаа уокка ас буһарыы киирбиттэрэ, ону таһынан байыаннай-спортивнай бэлэмнэниини тургутар түһүмэхтэр бааллара. Сүрүн түһүмэҕинэн Фёдор Попов хорсун быһыытын хатылыыр триатлон буолла: кыттааччылар өрүһү харбаан туораатылар, мэһэйдэрдээх суолу аастылар уонна ытыыга күрэхтэстилэр.
Триатлон чөмпүйүөнүнэн Бэдьимэ сэлиэнньэтиттэн төрүттээх, «Сахатранснефтегаз» АУо Мэҥэ Хаҥаластааҕы гаас эксплуатационнай учаастагын маастара Дмитрий Захаров буолла. Иккис миэстэҕэ — «Сахатранснефтегаз» АУо гааһы тардар ситимнэр управлениетын эксплуатацияҕа уонна өрөмүөҥҥэ сулууспатын старшай маастара Николай Григорьев, үһүс миэстэҕэ — «Моорук ыччаттара» хамаанданы билиһиннэрбит Ньургун Андреев таҕыстылар.
Кыргыттарга ынах ыаһыҥҥа Елена Аринкина чөмпүйүөнүнэн ааттанна. Дьүүллүүр сүбэ түргэни эрэ буолбакка, ыаммыт үүт ырааһын эмиэ сыаналаата.
От охсуута улахан күрэстэһиини таһаарда: аҕыс кыттааччыттан (ол иһигэр соҕотох кыыс — Жатайдааҕы гаас учаастагыттан Варвара Андреева) олохтоох Николай Ходулов кыайыылаах буолла. Оттон кутаа уокка ууну оргутууга Сыымах сэлиэнньэтин ыччаттара барыларыттан түргэн буоллулар. Аҕа дойду Улуу сэриитин устуоруйатын билиигэ ыытыллыбыт викторинаҕа улуустааҕы социальнай бэлиитикэ управлениетын «Манчаары ыччаттара» хамаандата кыайда. Кинилэргэ Ем. Ярославскай аатынан Дьокуускайдааҕы түмэлтэн уонна «Биир ньыгыл Арассыыйа» баартыйа өйөөччүлэрин Саха сиринээҕи сэбиэтиттэн анал бириистэри туттардылар.
Тэрээһиҥҥэ улахан суолталаах түгэнинэн «Дьоруойдар кэмнэрэ» үөрэх бырагырааматын кыттыылаахтара, Арассыыйа Федерациятын Дьоруойдара Куценко Дмитрий Михайлович уонна Соболев Николай Сергеевич кытта көрсүһүү буолла.
Биэс күрэхтэһии түмүгүнэн марафон бастакы Куубага тэрээһин хаһаайыттарыгар — Бэдьимэ нэһилиэгин Сыымах сэлиэнньэтин ыччатыгар тигистэ. «Сахатранснефтегаз» АУо ыччат сэбиэтэ уопсай түмүккэ 2-с миэстэни ылла, оттон Мэҥэ Хаҥаластааҕы уонна Намнааҕы гаас эксплуатационнай учаастактарын ыччатын холбоһуктаах хамаандата 3-с миэстэҕэ таҕыста.
«Дьоруой суола» бырайыак Бэдьимэ нэһилиэгин ыччатын көҕүлээһининэн, Арассыыйа Нефтегазстройпрофсойууһун Саха сиринээҕи тэрилтэтин бэрэссэдээтэлэ Василина Лукина салайыытынан олоххо киирдэ. Бу туһунан Саха сирин Идэлээх сойуустарын Федерациятын пресс-сулууспата иһитиннэрэр.
Өлүөхүмэ улууһун Кыыллаах нэһилиэгин олохтоохторун күүһүнэн уһуллубут «Тулаайах кыыс» киинэ көрөөччү дьүүлүгэр таҕыста. Уус-уран киинэ…
2026 сыл саҕаланыаҕыттан Арассыыйаҕа дьиэ кэргэҥҥэ аналлаах нолуоктан төлөбүр баар буолуоҕа. Бу туһунан сенатор Игорь…
Бүгүн, Норуот сомоҕолоһуутун күнүгэр, Арассыыйа Бэрэсидьиэнэ Владимир Путин дойдубут култуурунай нэһилиэстибэтин харыстыырга уонна элбэх омук…
Бүгүн, сэтинньи 4 күнүгэр, Дьокуускайга «Арассыыйа – мин устуоруйам» историческай паарка аттыгар байыаннай дьайыы зонатыттан…
Бүгүн – Норуот сомоҕолоһуутун күнэ. Оттон Арассыыйаҕа бырааһынньык диэн өрүү баай астаах остуолу кытта ситимнээх.…
Москваҕа Арбатскай-Покровскай лииньийэҕэ «Уһук Илин экспреһэ» диэн пуойас сүүрэн саҕалаата. Бу пуойас Норуот сомоҕолоһуутун күнүгэр…