«Сэбиэскэйдэр» Саҥа дьылы бииргэ көрсөбүт

2023 сылга Ньурба куоратын сирин-уотун тупсарыыга үлэ күүскэ барда. Куорат сыл устата 9 түөлбэҕэ арахсан, «Таптаа, олорор сиргин!» култуураҕа, успуорка уонна куораты тупсарыыга түөлбэлэр икки ардыларыгар бэстибээл чэрчитинэн, араас элбэх тэрээһин, күрэхтэһии субуотунньук ыытылынна, элбэх киһи кытынна.

Тупсарыы хайысхатыгар хас биирдии түөлбэҕэ оҕо былаһаакката, куорат иһинээҕи сквердэр сыһыарыллыбыттара. Сайын устата өрөмүөннээн, көҕөрдүү үлэтин ыытан, бу түһүмэхтэргэ иннибитин кимиэхэ да биэрбэтибит. Оҕо эргэ былаһааккатын өрөмүөннээн оҕолор үөрүүлэрэ үгүс. Ону таһынан, түөлбэ олохтооҕо И.И. Павлова «Алмазкредитсервис» эко-бырайыагар кыайан, П.Н. Мартынов аатынан сквергэ саҥа тыын биэрэн, дендрологическай сквер оҥордубут. Сквербит куорат биир тупсаҕай сирэ буолбутунан киэн туттабыт. Манна улахан көмөнү Ньурба куорат дьаһалтата оҥорон, бырайыак олоххо киирдэ. Мээчик күрэҕэр, мас олордуутугар эмиэ элбэх киһи кыттан хайҕаммыппыт.

Бэстибээлбит бүтэһик түһүмэҕэ ахсынньы 17 күнүгэр түөлбэ Саҥа дьылы бэлиэтээһининэн түмүктэннэ. Саҥа дьылы көрсөр тэрээһиммит бэрт сэргэхтик ааста. Ый инниттэн бэлэмнэнии үлэтэ ыытыллан, харыйабытын оҕолорбут көмөлөрүнэн, 75 устуука «Саҥа дьыллааҕы үтүлүктэри» бэйэбит тигэн бырааһынньыктааҕы араас фигуралары, олохтоохтор көмөлөрүнэн оҥорон, сквербитин киэргэттибит.

Кэлэр 2024 сыл – Дракон сыла уонна дойдубут баһылыга В.В. Путин биллэрбитинэн – Дьиэ кэргэн сыла. Онон биһиги сымыыттарын бэрт кыһамньылаахтык бүөбэйдии сытар Дракон хаар оҥоһукпут ыраахтан киһи болҕомтотун тардар дьэрэкээн бэйэлээх буолла. Барыта 60-н тахса киһи оҕолуун-уруулуун кэлэннэр, үөрүү-көтүү, сэргэхсийии таҕыста. Дьон бииргэ бу маннык Саҥа дьылы көрсөрүн суохтаабыт да эбит. Бары эҕэрдэлэһии, күлсүү-салсыы, долгуйуу… Тымныы оҕонньор, Хаарчаана, куобахчаан, о.д.а. буолан, илии-илииттэн сиэттиһэн харыйа тула эргийдибит. Эдэрдэри кытта бука бары флешмоб үҥкүүлээн тэйдибит. Манна түөлбэ 23 олохтооҕо маскарааттаах кэлбитин бэлиэтиэххэ наада. Түөлбэбит көхтөөх олохтоохторо, оҕолорбут бары маскараат кэтэн кэлэн, тэрээһиммит бэрт сэргэхтик ааста. Көрөргө олус үчүгэй, оҕо сааспытын санатта.

Бэстибээл устата көхтөөхтүк кыттыбыт дьоммутугар түөлбэ аатыттан добун суруктары, минньигэс бэлэхтэри туттардыбыт. Түөлбэбит биир көхтөөх оҕото Дайаана Лазарева, бу күннэргэ Ньурба оройуонуттан талыллан, Дьокуускайга Баһылык елкатыгар барарга бэлэмнэнэр. Киниэхэ тэҥнэһэр элбэх хайысхалаах гимназия 4-с кылааһын үөрэнээччитэ Егор Андреев буолар, дьоҥҥо биллэринэн — Егор Иванович. Бу оҕобут олох кыра сааһыттан куораты тупсарыыга бэйэтин холобурунан үтүө дьыалаҕа кыттыһар, дьону көҕүлүүр. Бу да сырыыга улахан дьонтон итэҕэһэ суох, бары тэрээһиннэргэ барытыгар кытынна. Маннык биирдиилээн көхтөөх дьон баар буоланнар, улахан хамсааһыннар тахсаллар. Кинилэр өрүү уопсай дьыалаҕа кытталларын сыаналыыбыт, махтанабыт, холобур оҥостобут.

Сотору Ньурба куорат «Сэбиэскэй» түөлбэтэ тэриллибитэ уонна мин түөлбэни салайбытым 15 сылын туолар. Түгэнинэн туһанан, «Сэбиэскэй» түөлбэ бары олохтоохторун кэлэн иһэр Саҥа дьылынан итиитик-истиҥник ис сүрэхтэн эҕэрдэлиибин. Баҕарабын күндү дьоммор кытаанах доруобуйаны, дьиэ кэргэҥҥитигэр дьолу, эйэни, санаабыккыт сатана турдун, толкуйдаабыккыт тобуллан, туппуккут тупсан истин!

Евдокия Моякунова, «Сэбиэскэй» түөлбэ салайааччыта