Сокуоннайа суохтук сөмөлүөтүнэн хаста да көппүт киһини ыстарааптаатылар

Тырааныспар Саха сиринээҕи борокуратуурата салгын суудунатынан сокуоннайа суохтук хаста да көппүт Саха сирин олохтооҕун эппиэтинэскэ тарта. Бу киһи барыта холбоон 23 тыһ.солк. ыстарааптанна. Бу туһунан Тырааныспар Илин-Сибиирдээҕи борокуратуурата иһитиннэрэр.

Кэтээн көрөр тэрээһиннэр кэмнэригэр олохтоох киһи РФ Салгын кодексын уонна Федеральнай авиационнай бырабыыланы кэспитин быһаарбыттар. Бу киһи көҥүлэ суох, судаарыстыбаннай уонна регистрационнай бэлиэтэ, сэртипикээтэ, пилот сибидиэтэлистибэтэ, мэдиссиинискэй көрдөрүүтэ суох Maule диэн сөмөлүөтү хаста да көтүппүт.

Онон бу пилот үс ыстатыйанан административнай эппиэтинэскэ тардыллан, 23 тыһ. солк. ыстарааптанна.