Семен Данилов аатынан Бэрдьигэстээх оскуолатыгар — көлүөнэлэр көрсүһүүлэрэ (видео)

Горнай улууһугар Семен Данилов аатынан Бэрдьигэстэзх оскуолатыгар көлүөнэлэр көрсүһүүлэрэ сүрдээх өрө көтөҕүллүүлээхтик, үөрүүлээх быһыыга-майгыга буолан ааста.

Күндү биир дойдулаахтарбыт, выпускниктарбыт, араас сылларга үлэлээбит биир идэлээхтэрбит, үбүлүөй үөрүүтүн тэҥҥэ үллэстэн, күндү ыалдьыт буоллулар. Оҕо саас кэрэ кэмнэрин, дьикти саас сырдык иэйиилэрин эргитэн, ааспыты ахтан-санаан аастылар, бүгүҥҥү күммүт алгыһынан инники кэскилбитин түстээтилэр!

Сарсыардаттан оскуолаҕа кэлбит ыалдьыттары регистрациялааһын ыытыллан, барыта 250-тан тахса араас кэмҥэ оскуоланы бүтэрбит, үлэлии сылдьыбыт ыалдьыттар ыраахтан-чугастан мустубуттара билиннэ. Бу кэнниттэн оскуола спортивнай саалатыгар выпускниктар параадтара өрө көтөҕүллүүлээхтик буолла.

Бастакынан, оскуоланы 1953 сыллаахха бүтэрбит 2 выпускник, ытык мааны дьоммут Стручкова Елизавета Ильинична тыыл, педагогическай үлэ бэтэрээнэ, Абый улууһун Бочуоттаах олохтооҕо, Васильева Наталья Григорьевна – тыыл, педагогическай үлэ бэтэрээнэ, Горнай улууһун Бочуоттаах олохтооҕо кэлэн долгутуулаах, үөрүүлээх параады астылар. Салгыы 1958, 1963, 1968, 1973, 1978, 1983, 1988, 1993, 1998, 2003, 2008, 2018 сылларга оскуоланы бүтэрбит выпускниктар, төгүрүк сылларын бэлиэтиир көлүөнэ көрсүһүүтүгэр кылааһынан киирэн истилэр.

Мустубут дьону үөрэх управлениетын начаалынньыга Варвара Сметанина, дириэктэр Маргарита Константинова, бастакы выпускниктар, бэтэрээн учууталлар эҕэрдэлээтилэр. Кэлбит ыалдьыттар салгыы кылаастарынан тарҕаһан, араас уруоктарга сылдьан, ыалдьыттаан, үөрэнэн, дьоллоох оҕо саастарын эргитэн ыллылар.

Көлүөнэ көрсүһүүтүн үөрүүлээх чааһыгар улуус баһылыга Никита Андреев, бары көлүөнэ выпускниктар үөрэммит оскуолалара саҥаттан саҥа хамсааһыннары олоххо киллэрэн, өссө элбэх ситиһиилэринэн кынаттанан сайда турарыгар баҕардылар. Оскуоланы бүтэрбиттэрэ 70, 65, 60, 55 , 50 сыллаах выпускниктар ахтыылара, үүнэр көлүөнэҕэ кэс тыллара мустубут дьон сүргэлэрин көтөхтүлэр. Оскуолатааҕы сылларын санаан уһун переменаҕа, оскуола остолобуойугар ирэ-хоро кэпсэтэн, минньигэстик аһаан умнуллубат оскуолатааҕы сылларын күлэ-үөрэ, долгуйа-манньыйа истиҥник ахтан-санаан аастылар.

Үбүлүөйгэ сылдьыбыт эрэ барыта олус дуоһуйан тарҕаста. Күүтүүлээх тэрээһин кыттыылаахтара саҥа оскуолаҕа көһөн, инники өттүгэр үүнэр көлүөнэни үөрэтиигэ-иитиигэ кэскиллээх үлэ салҕанарыгар баҕа санааларын бастыҥын анаатылар, оскуола кээктиибигэр, үөрэнээччилэргэ, бары үлэһиттэргэ истиҥ махталларын эттилэр.

«Кэскил” медиа-оскуола

Видеоҕа уһулла А.Санникова

Хаартыскалар Семен Данилов аатынан Бэрдьигэстэзх оскуолатыттан