Семен Давыдов: «Өйөөһүн үлэтэ салгыы барар»

Амма улууһун Сатаҕай нэһилиэгин баһылыга Семен Давыдов байыаннай дьайыыга нэһилиэктэн кыттыбыт уонна кытта сылдьар байыастарга, кинилэр дьиэ кэргэттэригэр туох көмө, өйөбүл оҥоһулларын туһунан кэпсээтэ.

— Биһиги нэһилиэктэн 2022 сыл сайын Ф.Никитин уонна И.Собакин баҕа өттүлэринэн байыаннай эпэрээссийэҕэ кыттан кэлбиттэрэ итиэннэ 2022 сыл күһүҥҥү ыҥырыынан Ф.Андреев онно барбыта.

Олохтоох дьаһалта өттүттэн бу уолаттар дьиэ кэргэттэригэр 20-лии тыһыынча солк. биир кэмнээх көмө оҥоруллубута. Ф.Андреев дьиэ кэргэнигэр туох кыалларынан күннээҕи олохторугар эбии көмөнү оҥоробут. Ол курдук, күһүн идэһэ астааһыныгар, муус бэлэмнээһинигэр көмөлөспүппүт, нэһилиэгинэн көмө харчы хомуйан туттарбыппыт. Кыстык отторун ходуһаттан аҕалыыга Тимофей Лукин аатынан производственнай кэпэрэтиип күүс-көмө буолла. Дьиэ кэргэн күннээҕи кыһалҕатын билсэргэ кыһаллабыт. Бу дьоммутун өйөөһүн үлэтэ салгыы бара турар.