Сенатор Александр Акимов: «Биһигини кытта кырдьык кыттыһар!”

Алтынньы 4 күнүгэр, Федерация Сэбиэтэ Донецкай уонна Луганскай норуодунай өрөспүүбүлүкэлэрин, Запорожскай уонна Херсонскай уобаластары Арассыыйа састаабыгар киллэрэр туһунан дуогабардары ратификациялаатылар. Бу туһунан Федерация Сэбиэтин чилиэнэ Александр Акимов санаатын үллэстэр.

Киирбит дуогабардары бу иннинэ Федерация Сэбиэтин федеративнай тэриллиигэ, эрэгийиэннээҕи бэлиитикэҕэ, олохтоох салайыныыга уонна Хотугу сир дьыалаларыгар профильнай кэмитиэтин мунньаҕар көрбүттэрэ.  Кини бу боппуруоска кэмитиэт халбаҥнаабакка биир санаанан быһаарыныы ылыммытын санатта. Сенатор этэринэн, бүгүн устуоруйа кырдьыга сөргүтүлүннэ.

«Мантан ыла биһиэхэ 89 Арассыыйа субъега баар буолла. Валентина Ивановна Матвиенко эппитинии – биһиги биир норуоппут. Арассыыйа састаабыгар саҥа эрэгийиэннэр киириилэрин биһиги өйүүбүт, тоҕо диэтэххэ бу — референдумҥа кэлбит мөлүйүөнүнэн дьон баҕа санаата. Бу хайысхаҕа Саха сирин Ил Дархана Айсен Николаев, СӨ Бырабыыталыстыбата, өрөспүүбүлүкэ бары депутаттара биир бигэ санаалаахпыт”, — диэн тоһоҕолоон эттэ Александр Акимов.

Сенатор этэринэн, үгүс омук иллээхтик олорор Саха сиригэр Украинаттан, Донбасстан төрүттээх элбэх киһи олохсуйан үлэлии олороро кинилэр Арассыыйаны талбыттарын туоһулуур.

«Кинилэри түһэн биэрэр бырааппыт суох, — диир Александр Акимов. — Түөрт ый устата Саха сирэ ДНӨ Кировскай куоратын инфраструктуратын, социальнай эбийиэктэрин сөргүтэргэ көмөлөһөр. Онно биһиги дьоммут илэ тиийэн дьон туох настарыанньалааҕын көрбүттэрэ, референдум ыытарга көмөлөспүттэрэ”.

“Киирии дуогабардарын ратификациялааһын – устуоруйаҕа киирэр суолталаах түгэн. Онон биһиги үөрүүбүтүн кистээбэппит. Биһигини кытта кырдьык кыттыһар!”, — диэн санаатын этэр Александр Акимов.