Сербияҕа сайыны көрсө ыһыах ыстылар

Сербияҕа сайыны көрсө ыһыах ыстылар

04.06.2024, 17:15
Хаартыска: социальнай ситимнэртэн.
Бөлөххө киир:

Бэс ыйын 1 күнүгэр Белград куорат Прогар диэн сиргэ сайыны көрсө “Аан дойду ыһыаҕа-2024” саха национальнай бырааһынньыга ыытылынна. Ыһыах Арассыыйаҕа Дьиэ кэргэн, Саха сиригэр Оҕо аймах сылларыгар, итиэннэ СӨ Бастакы Бэрэсидьиэнэ Михаил Николаев кэриэһигэр ананна.

Бырааһынньыгы Лариса Кулаковская, саха литературатын төрүттээччи А.Е. Кулаковскай сиэнэ, РФ үөрэҕириитин бочуоттаах үлэһитэ, “Едины в помыслах” аан дойдутааҕы бырайыак ааптара, “Саха сирин киэн туттуута” уопсастыбаннай куонкурус “Норуот дипломата” анал аатын кыайыылааҕа тэрийэн ыытта.

Тэрээһин СӨ Тас сибээстэргэ уонна норуоттар дьыалаларыгар министиэристибэ, СӨ Култуура, духуобунай сайдыы министиэристибэтин, А.Е. Кулаковскай аатынан Доҕордоһуу дьиэтин, Суорун Омоллоон аатынан Опера, балет тыйаатырын, “Николаев-Центр” архыып-бибилэтиэкэ көмөлөрүнэн буолла.

Аан дойду 17 дойдутуттан — Францияттан, Италияттан, Эстонияттан, Германияттан, Швецияттан, Ирландияттан, Словенияттан, Словакияттан, Венгрияттан, Черногорияттан, Казахстантан, Болгарияттан, Бельгияттан, Финляндияттан, Сенегалтан, Арассыыйаттан уонна Сербияттан барыта 150-ча киһи үөрэ-көтө бу күҥҥэ кэллилэр.

Бырааһынньык бочуоттаах ыалдьыттарынан Сербия интеллигенциятын бэрэстэбиитэллэрэ, култуура, ускуустуба сыанаһыттара, дипломатическай сулууспа үлэһиттэрэ буоллулар. Ол курдук,  РФ посолун солбуйааччы Александр Кононыхин, Казахстан Өрөспүүбүлүкэтин посольствотун консула Абзал Иманкулов, Белград этнографическай түмэлин дириэктэрэ Марко Крстич, Сурчин муниципалитет бэрэсидьиэнэ Шуша Стева, муниципальнай мунньах дьокутааттара Радосава Йович, Весна Шалович, Сурчин култуураҕа салаатын начаалынньыга Чирьяк Душан, Белград хомунаалынай сулууспатын дириэктэрин солбуйааччы, туристическай управление бэрэссэдээтэлэ Сава Живач, Арассыыйатааҕы биир дойдулаахтар  Координационнай Сэбиэттэрин бэрэссэдээтэлэ Александр Айгенович о.д.а. сырыттылар.

Үөрүүлээх аһыллыы церемонията алгыстан саҕаланна, СӨ норуодунай артыыһа Дмитрий Артемьев алҕаата. Саха эстраадатын сулустара: СӨ норуодунай артыыһа Дмитрий Артемьев, этно-ырыаһыт Лэгэнтэй, Эстрада тыйаатырын ырыаһыта Умсуура, Опера, балет тыйаатырын солиһа Александр Емельянов, ааптар, толорооччу Ольга Голдобина, этномузыковед, хомусчут Сайдыы куо Федорова кэргэнин Оскар Сауту кытта уонна ДДН салаатын сэбиэдиссэйэ Анастасия Дарбасова кыттыылаах кэнсиэр буолла.

Ыһыах өрөгөйдөөх чааһа оһуохайынан түмүктэннэ, манна бары киирэн үҥкүүлээтилэр. Бырааһынньык чэрчитинэн сахалыы таҥастары, саха национальнай куукунатын уонна Кэрэни көрбүт” киинэни көрдөрдүлэр.

Лариса Кулаковская маннык диир: “Аан дойду ыһыаҕа” – бу бары дойдуларынан бэриллэн иһэр бырайыак. Эһиилги ыһыах Монголияҕа ыытыллыаҕа. Мин санаабар, “Аан дойду ыһыаҕа”,– бу култуурунай тэрээһин эрэ буолбатах, араас дойдуларга олорор саха диаспораларын түмэр, Саха сирин, Арассыыйаны аан дойдуга билиһиннэрэр улахан бырайыак буолар. Араас дойдуларга олорор Саха сириттэн төрүттээх дьон Саха сирин кытта сибээстэһиэхтэрин баҕараллар. Булкаас дьиэ кэргэннэр оҕолоругар, сиэннэригэр омуктарын тылын, үгэстэрин, култууратын биэриэхтэрин баҕараллар. Аан дойду ыһыаҕа биһигини култуурунай сыаннаспытын сайыннарарбытыгар, Саха сирин дьонун уонна тас дойдулардааҕы доҕотторбутун кытта сибээһи бөҕөргөтөрбүтүгэр көмөлөһөр.

Ыһыах кыттыылаахтара үүммүт сылга үтүөнү-кэрэни түстүүр алгыһы ыллылар. Европаҕа олорор Саха сирин дьоннноро улаханнык астынан бырааһынньыкка сырыттылар, аччыгый дойдуларын кытта ситимнээбиттэрин, ыһыахтыыр кыаҕы биэрбиттэрин иһин тэрийээччилэргэ барҕа махталларын тиэртилэр диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.

+1
4
+1
0
+1
0
+1
0
+1
0
+1
0
+1
0
Бары сонуннар
Салгыы
21 июля
  • 28°C
  • Ощущается: 28°Влажность: 39% Скорость ветра: 2 м/с

Сообщить об опечатке

Текст, который будет отправлен нашим редакторам: