Сэрэдэҕэ уонна чэппиэргэ тымныйар, ардах түһэр

Сэрэдэҕэ уонна чэппиэргэ, ыам ыйын 14-15 күннэригэр, Саха сиригэр үгүс оройуоннарынан уонна киин улуустарынан кыралаан ардах түһэрэ күүтүллэр. Бу туһунан УГМС саайта иһитиннэрэр.

Ол курдук, өрөспүүбүлүкэ үгүс оройуоннарынан быстах ардыыр. Кыра тыаллаах, хотуттан, хотугулуу-арҕааттан сөкүүндэҕэ 9-14 м. түргэннээх тыаллаах.

Ыам ыйын 14 күнүгэр үгүс оройуоннарынан ардыыр, соҕуруу, соҕуруулуу-илин оройуоннарынан ардах түһэр.
Ыам ыйын 15 күнүгэр Томпоҕо, Өймөкөөҥҥө ардыыр. Хотугулуу-арҕаа, хоту оройуоннарынан инчэҕэй хаар түһэрэ сабаҕаланар.

Салгын температурата түүн -1,+4°, хоту -1-6°, хоту байҕал кытылынан -5-10°, күнүс +7+12°, хоту, хотугулуу-арҕаа 0,+5°, хоту байҕал кытылынан -2-7° кыраадыс тымныы. Халымаҕа сөҥүүтэ суох, салгын температурата түүн -1,+4°, күнүс +13+18° кыраадыс сылаас.

Дьокуускайга ыам ыйын 14-15 күннэригэр ардыыр, салгын температурата түүн +6,+7°, күнүс +8,+9° кыраадыс сылаас. Илинтэн сөкүүндэҕэ 2-3 м. түргэннээх тыаллаах.