Сэрэҕэ суох буолууттан дьиэ умайа сыспыт

Ахсынньы 29 күнүгэр сарсыарда 11 аҥаар чааска баһаарынай-быыһыыр сулууспаҕа Дьокуускай куорат Дежнев уулуссатыгар турар элбэх кыбартыыралаах дьиэҕэ баһаар буолбутун туһунан суһал  иһитиннэрии киирбит.

Баһаарынай-быыһыыр сулууспа үлэһиттэрэ тиийиилэригэр, баһаар буола турара көстүбэт эбит. Биир кыбартыыраҕа суорҕан умайбыт. Уоту сэрэҕэ суох туттуу түмүгэр, кыбартыыраҕа 0,5 кв.м. иэннээх сир умайбыт.

Ахсынньы 29 күнүгэр сарсыарда 10 чаас 45 мүнүүтэҕэ Үөһээ Бүлүү сэлиэнньэтигэр Гагарин уулуссатыгар чааһынай дьиэ умайа турарын туһунан суһал иһитиннэрии киирбит. Баһаарынайдар 3 мүнүүтэнэн тиийбиттэрэ, аһаҕас уот  күүдэпчилэнэн эрэр эбит. Баһаар түмүгэр сарайын 2 кв.м. иэннээх сирэ умайбыт. Чугас турар чааһынай дьиэни быыһаабыттар. Хоромньу уонна буруйдаах чопчуланар.

Ахсынньы 29 күнүгэр күнүс 3 чаас 32 мүнүүтэҕэ Дьокуускайга Бабушкин уулуссатыгар элбэх кыбартыыралаах дьиэҕэ баһаар буолбутун туһунан иһитиннэрбиттэр. Баһаарынайдар кэлбиттэрэ, баһаар буола турара көстүбэт эбит.  Биир кыбартыыра истиэнэтигэр 0,1 кв.м. иэннээх сир умайбыт. Элэктэриичэстибэҕэ үлэҕэ сэрэҕэ суох буолууттан умайбыт диэн ЫБММ Баһаарынай-быыһыыр сулууспата иһитиннэрэр.