Сергей Анисимов: «Саҥа нолуок тиһигин киллэрии дойду экэниэмикэтин тупсарыаҕа»

Сотору кэминэн Госдумаҕа РФ Үп министиэристибэтэ киллэрбит нолуок тиһигин тупсарар туһунан сокуон барыла ылыллыаҕа. Сокуон барыла 2025 сылтан нолуокка улахан уларыйыылары киллэриэҕэ. Нолуок ыстаапката нэһилиэнньэ дохуотун кээмэйиттэн уонна киллэринэр дохуотун көрүҥүттэн тутулуктаныаҕа.

-Нолуок тиһигэр уларытыылары киллэрии боппуруоһа сытыырхайбыта ыраатта, — диэн Бүтүн Арассыыйатааҕы олоҕу хааччыйыы Сойууһун бэрэссэдээтэлэ, Уопсастыбаннай балаата чилиэнэ Сергей Анисимов этэр.

«Кэлиҥҥи сылларга нэһилиэнньэ дохуоттарын үрдүк социальнай-экэнэмиичэскэй дифференциацията оннунан хаалар. Онон нолуокка уларытыылары киллэрии хаһан эрэ буолуохтаах этэ. Биэдэмистибэ көҕүлээһинин норуот өйүөҕэ диэн эрэнэбин», – диэтэ Сергей Анисимов. Сергей Егорович нолуокка уларыйыылар норуот үксүтүн таарыйыа суоҕа диир.

«Бу уларыйыылар анал байыаннай дьайыы кыттыылаахтарын дохуоттарын таарыйыа суоҕа диэн сокуон барылыгар ыйыллар. Нолуок ыстаапкатын улаатыннарыы сылга 2,4 мөл. солк. дохуот киллэринэр гражданнарга улаатыаҕа. Кинилэргэ нолуок ыстаапката 15% диэри үрдүөҕэ. Онон сокуону оҥорооччулар санааларынан, нолуокка уларытыылар 2 мөлүйүөн киһини таарыйыаҕа», — диэн кини бэлиэтиир.

«Саҥа нолуок тиһигин киллэрии дойду экэниэмикэтигэр үтүө түмүктэрдээх буолуоҕа», — диир СӨ Уопсастыбаннай палаататын чилиэнэ.